Distrikan’Ankazobe : Efa azo ampiasaina indray ny toho-drano sy ny lakan-drano mirefy 2 800m ao Maharidaza
Mitombo hatrany ny ezaka ho fampivoarana ny famokarana. Mahazo anjara amin’izany avokoa ny tantsaha rehetra manerana ny Nosy. Notokanana omaly ny fotodrafitr’asa ho fanatsarana ny fambolena tao Maharidaza. Toho-drano sy lakan-drano mirefy 2 800metatra no sitrahin’ireo tantsaha amin’izany.
Kaominina Ambolotarakely
Miantoka ny fampivoarana ny famokarana, ny fananana fotodrafitrasa, ka ho fanamafisana ny fanatsarana ny vokatra dia nisy fanarenana natao tamin'ireo lakan-drano mirefy 2800 metatra sy toho-drano. Manondraka lemaka 300 hektara ao amin'ny fokontany Maharidaza, kaominina Ambolotarakely, distrikan'Ankazobe ireo fotodrafitrasa ireo. Marihina fa vokatry ny fiaraha-miasa teo amin’ny Ministeran’ny Fambolena sy ny Fiompiana, ny Faritra Analamanga ary ny PNUD izay nanohana ara-bola ny fahavitan’izany fotodrafitrasa izany. Hanampy indrindra amin’ny fambolena sy fampitomboana ny vokatra izany. Nanamarika ireo tantsaha fa afaka hanampy tosika ny famokarana izany ny toho-drano sy ny lakan-drano. Afaka hamokatra indroa isan-taona izy ireo ka hahatratra ny tanjona amin’ny fahavitan-tena ara-tsakafo.
Tokantrano miisa 250
Samy manantena fa hitondra fampandrosoana maharitra ao amin’ny faritra, ny fahavitan’ireo fotodrafitrasa ireo. Tokantrano hatramin’ny 250 any an-toerana mantsy no heverina hahazo tombontsoa amin’izany. Marihina fa efa nahazo fiofanana mikasika ny fikojakojana ny fotodrafitrasa sy ny fitantanana fikambanana avy amin’ireo teknisianina eo anivon’ny Fitaleavam-paritry ny Fambolena sy ny Fiompiana, izy ireo, hoy ny avy ao amin’ny Ministeran’ny Fambolena sy ny fiompiana. Ao anatin’izany dia tanjona kendrena ny fampiakarana ny fari-piainan’ireo mponina. Hitondra tombontsoa amin’ny fampihenana ny asa ratsy sy ny asan-dahalo izay miha-mafy any an-toerana ihany koa izany fampiakarana ny fari-piainana izany.
