Fitantanana: Miroso ny ezaka fanatsarana ny fikirakirana ny taratasy manodidina ny fananan-tany

Vahaolana amin’ny olan’ny fananan-tany

Tanjona amin’ity fidinana ifotony ity dia ny fijerena ny tena fandrosoan’ny asa manodidina ny fametrahana rafitra manaraka ny haitao ara-kajy mirindra eo amin’ny fikirakirana ny taratasy. Mikendry ny mangarahara sy ny fanamorana ny asa avokoa izany. Raha ny antontan’isa voahangona mantsy hoy ny avy ao amin’ny Ministeran’ny Fitsinjaram-pahefana sy ny fanajariana ny tany dia 8% ny taratasy momba ny tany no rovitra izany hoe 18 168 no mila havadika ho nomerika, ho an’i Nosy Be manokana. Eo amin’ny sehatra nasionaly kosa dia 20% ny boky sy ny sarin-tany no rovitra. Araka izany, ity fidirana amin’ny fampiasana teknolojia ity dia afaka hanampy amin’ny fanamorana ny asa fanavaozana izany rehetra izany. Ankoatra izany dia mbola anisan’ny maha-zavadehibe ity fanatsarana ity ihany koa ny asa manodidina ny fangatahana fanamarinana ny fananan-tany miisa hatramin’ny 10 000 eo ho eo amin’izao. Eo ihany koa ny fizarana sarin-tany mitokana miisa hatramin’ny 2 000 isan-taona eny amin’ny farim-piadidian’ny fananan-tany.

Sampan-draharaha roa

Raha tsiahivina dia anisan’ny ezaka ho tratrarina ny fampitoviana ny faritra rehetra mba hahafahana manatratra ny tanjona amin’izany fanamorana asa izany. Araka izany, miisa roa ny sampan-draharaha ny fananantany no efa an-dalam-panatanterahana ny fametrahana io haitao ara-kajy mirindra io. Anisan’izany i Antananarivo renivohitra sy i Nosy Be. Zava-dehibe izany fampidirana ny teknolojia izany raha tsy hiteny fotsiny afatsy ny fiarovana ny tanin’olona iray. Anisan’ny sehatra iray tena ahitana fifandirana matetika mantsy ny manodidina ny fananan-tany. Raha ny antontan’isa farany ihany koa izao dia raharaha momba ny ady tany miisa 1 000 isan-taona ihany koa no tsaraina eny amin'ny Fitsarana. Araka izany, mbola azo lazaina ho mbola alavitra ny lalana amin’izany ezaka izany.