MICS 7 : Hotanterahina amin’ity taona ity ny fanadihadiana momba ny toe-piainan’ny ankizy sy ny vehivavy andiany faha-7

Enina tapitrisa dolara

Fanadihadiana ho tanterahina amin’ny faritra miisa 23 manerana ny Nosy ity kasaina ho atao ity. Tokantrano miisa hatramin’ny 21 000 no hanatonana amin’izany. Vola mitentina 6 000 000 dolara kosa no hahetsika ao anatin’ny asa. Ny USAID sy ny UNICEF no miara-misalahy amin’ny Madagasikara mamatsy vola izany asa izany. Marihina rahateo fa asa lehibe ity ho tanterahina ity satria lehibe ihany koa ny tanjona. « Andrasana amin’ity andiany faha-fito ity ny hanatrarana ny 43% amin’ny tanjon’ny fandrosoana lovainjafy (ODD) sy ny fanatanterahana ny Politika Ankapoben'ny Fanjakana », hoy i Razafimiarantsoa Tovonirina, tale misahana ny antontanisa ao amin’ny INSTAT. Ho jerena ao anatin’io asa io araka izany ny fivoarana misy eo amin’ireo ankizy sy ny vehivavy. Hahafahana manara-maso ny fivoarana ity fanadihadiana ity mba hahafahana mamolavola ny fandaharan'asa sy ny drafitra isan-tsehatra vaovao indray.

Sehatra marolafy

Hahafahana manatratra ireo tanjona ho amin’ny fampandrosoana lovain-jafy ireo dia mivelatra amin’ny sehatra isan-karazany ny fanadihadiana. Ao anatin’izany ny fahasalaman'ny reny sy ny zaza, ny fanabeazana sy ny fiarovana ny ankizy, ny mikasika ny VIH/SIDA ary ny rano sy ny fidiovana. Tsara ihany koa ny manamarika fa tamin’ity andiany fahafito ity vao nampidirina izany resaka manodidina ny rano sy ny fidiovana izany. « Mandeha amin’ny onja ity fanadihadiana ity ary misy hatrany ny fivoarana. Tamin’ity onja faha-fito ity izao vao nampidirina ny rano sy ny fidiovana mba hahafahana mahazo fanampin’ny angon-draikitra ilaina », hoy hatrany ny fanazavana. Ilaina avokoa mantsy izany rehetra izany mba ho amin’ny fanatsarana ny fiainan’ny Malagasy aoriana kely ao.