Fiarovana ny honko : Namoaka boky fanentanana, amin’ny teny malagasy, ny WWF Madagasikara

Karazany fito

Saika ahitana ala honko daholo manerana ny sisin-dranomasin’i Madagasikara, fa any amin’ny morontsiraka andrefana no tena ahitana azy betsaka. Manodidina ny 73 karazana ny honko hita maneran-tany, ka ny 9 karazana amin’ireo no hita eto Madagasikara. Isan’izany ny afiafy na mosotry ; ny songery na farafaka, ny tangambavy na honko vavy, ny tangandahy na honko lahy na ihany koa agnabo vahatra sns. Nanomboka ny taona 1995 dia tombanana ho manodidina ny 3 000 hektara ka hatramin’ny 7 000 hektara isan-taona ny ala honko simba eto Madakasikara, vokatry ny tsindry isan-karazany, toy ny fanapahana hazo honko hamokarana hazon-trano sy arina fandrehitra ; ny famadihana ny faritra honko ho lasa toeram-pambolena sy fiompiana ; ny fanorenana sy fonenana tsy ara-dalana ao anaty faritra ala honko na manodidina azy ; ny fiovaovan’ny toetr’andro… Tena zava-dehibe ho an’ny zava-manan’aina anefa ny honko, raha tsy hilaza fotsiny fa ny ala honko dia mangeja avo 5 heny ny entona karbônina raha mitaha amin’ny ala an-tanety.

Boky mora azo

Vitsy ny boky miompana amin’ny tontolo iainana no voasoratra amin’ny teny malagasy, nefa dia fomba iray ahafahana mampahafantatra ny Malagasy ny maha-zava-dehibe ireo harena voajanahary misy eo amin’ny taniny ny boky, raha azony tsara izay voalaza ao anatiny. Isan’ny antony namokaran’ny WWF Madagasikara ity gazety boky nampitondraina ny lohateny hoe : “Ny rohivoary honko” ity izany. Novokarina ato anatin’ny tetikasan’ny WWF mitondra ny anarana hoe : “mangroves for community and climate”, na “ Ala honko ho an’ny mponina sy ny toetr’andro” izy ity. Novolavolaina manokana ity boky ity mba ho mora azon’ny olon-drehetra tsy an-kanavaka, na tsy manana fahalalana manokana momba ny rohivoahary an-dranomasina sy ny manodidina azy aza. Tanjona ny hampahafantarana ny rohivoary honko sy ny hanentanana ny olona rehetra ny amin’ny tokony hiarovana sy hanajariana azy ireny.