Fanatsarana fotodrafitrasa : Mandray anjara amin’ny Fihaonambe manerantany momba ny lalana i Madagasikara

Fiaraha-miasa vaovao miaraka amin’ny Turquie

Hantenaina ny hisian’ny fiaraha-miasa vaovao. Raha ny fanazavana tao amin’ny Pejin’ny Ministera mantsy dia nandray anjara tamin’ny fitenenana ny Minisitra. Nandritra izany no nanazavany ny paikady sy ireo asa tanterahina eto Madagasikara mahakasika ny lalana sy ireo lohahevitra maro ireo. Niresaka mikasika ny tetikasa lalambe migodana ihany koa izy nandritra ny fihaonany manokana tamin'ny Minisitra « turque » misahana ny lalana, Andriamatoa Abdulkadir Uraloğlu. Ity farany izay naneho fahavononana hifanome tanana sy hifampizara traikefa mahakasika an’izany. Vonona ihany koa ireo mpampiasa vola ao Turquie, anisan’izany ny « Groupe ASER », izay mikasa ny hanamboatra ny ampahan’ny lalam-pirenena fahafito (RN7), mampitohy an’Antananarivo sy Toliara. Anisan’ny vokatra azo tsapain-tanana manokana ho an’ny Madagasikara izany, nandritra ity fihaonambe ity. Raha tsiahivina mantsy dia mbola betsaka ireo lalana mila fanamboarana sy fanavaozana eto Madagasikara.

Mpamatsy vola isan-karazany

Anisan’ireo Minisitra maherin’ny roapolo (20) misahana ny lalana sy fitaterana mandray anjara amin’ity fihaonambe faha 28 ity ny minisitra avy eto Madagasikara. Ankoatra ireo minisitra anefa dia eo ihany koa ireo mpamatsy vola iraisam-pirenana maro toy ny Eximbank avy ao Chine, ny Banky Iraisampirenena, ny « Banque Européenne d’Investissement », sy ireo maro hafa. Lohahevitra maro no noresahana nandritra ny andro vitsivitsy, toy ny faharetan’ny lalana manolona ny fiovaovan’ny toetrandro, ny arolozan’ny fifamoivoizana. Indrindra indrindra ny mikasika ny fampiasana ireo fiara elektrika izay efa manomboka mahazo vahana amin’izao fotoana izao.