Ireo zavatra tsy tandrina mampitombo ny aretim-bavony « gastrite »

Fihinanana sakafo masiaka loatra na « acide » be

Ny sakafo masiaka, be sakay, be menaka, na misy « acide » avo (toy ny voasary be loatra, voatabia, na saosy indostrialy) dia mety hahatonga « irritation » be amin’ny vavony efa marefo. Rehefa miverimberina izany dia tsy vitan’ny hoe mampitombo fanaintainana fotsiny fa mety hiteraka mavaivay sy fahatsapana « ballonnements » ao an-kibo ihany koa.
Amin’ny olona efa manao « gastrite » dia mora mipoitra ny fahatsapana mavaivay ao amin’ny vavony rehefa avy misakafo. Noho izany dia tsara kokoa ny misafidy sakafo malefaka sy mora levonina toy ny vary, legioma masaka tsara, na lasopy maivana tsy misy hanitra mahery.

Mandingana sakafo na misakafo tsy ara-potoana

Rehefa mandingana sakafo ny olona iray dia mbola mamokatra « acide » ihany ny vavony, nefa tsy misy sakafo ho levonina amin’izany. Izany no mahatonga ny rindrin’ny vavony ho voa sy ho mora « irrité », ka mitombo ny fanaintainana sy ny “crise” amin’ny « gastrite ».
Ny fihinanana amin’ny ora mitovy isan’andro dia manampy ny vavony hiasa ara-dalàna sy milamina kokoa. Na dia sakafo kely aza dia efa manampy amin’ny fiarovana ny vavony tsy hiharan’ny « acide » be loatra.

Fampiasana fanafody fanaintainana be loatra

Ny fanafody toy ny « ibuprofène » na « aspirine » dia tena ilaina amin’ny fanaintainana, saingy raha ampiasaina matetika na atelina foana dia mety hanimba tsikelikely ny rindrin’ny vavony. Izany dia mampitombo ny « inflammation » sy mety hiteraka « gastrite » na hampihombo ny efa misy.
Indraindray dia tsy tsapan’ny olona izany raha tsy efa miverimberina ny fanaintainana. Noho izany dia tsara foana ny manontany dokotera alohan’ny hampiasana fanafody mandritra ny fotoana maharitra.

Fisotroana toaka sy fifohana sigara

Ny toaka sy ny sigara dia anisan’ny fahazarana manimba mivantana ny vavony. Izy ireo dia mampitombo ny famokarana « acide » ary manimba ny fiarovan’ny rindrin’ny vavony, ka mahatonga ny fanaintainana ho mora miverina.
Ankoatra izany dia manemotra ny fahasitranana ihany koa izy ireo, ka mahatonga ny « gastrite » ho maharitra kokoa. Na dia amin’ny fatra kely aza dia mbola mety hisy fiantraikany ratsy hatrany, indrindra raha efa marefo ny vavony.

Rarintsaina sy tebiteby tsy voafehy

Ny rarintsaina dia misy fiantraikany mivantana amin’ny « système digestif » na rafi-pandevonan-kanina. Rehefa be tebiteby ny olona dia mitombo ny « acide » ao an-kibo. Izany moa dia miteraka fanaintainana, mavaivay, ary fahatsapana tsy milamina ao an-kibo.
Mety hiharatsy koa ny fiantraikan’ny otrikaretina toy ny « Helicobacter pylori », izay iray amin’ireo antony mahazatra mahatonga « gastrite ». Ny fialana sasatra, ny torimaso tsara, ary ny fanazaran-tena tsotra toy ny fandehanana an-tongotra dia afaka manampy betsaka amin’ny fampitoniana ny vatana sy ny vavony.

Fisotroana kafe be loatra sy zava-pisotro misy gazy

Ny kafe sy ny zava-pisotro misy gazy dia mampitombo ny « acide » ao amin’ny vavony. Ny fisotroana azy ireny matetika dia mety hiteraka fanaintainana tampoka, mavaivay, na « ballonnements » ao amin’ny kibo.
Ho an’ny olona efa tratry ny « gastrite » dia tsara ny mampihena azy ireo, na misotro azy aorian’ny sakafo, mba hampihenana ny « irritation » ao an-kibo.

Tsy miraharaha ny soritr’aretina

Maro ny olona no tsy miraharaha firy raha vao manomboka misy fanaintainana kely na « irritation » ao an-kibo. Saingy rehefa avela ela izany dia mety hiharatsy tsikelikely ny « gastrite » ary lasa sarotra tsaboina.
Anisan’ireo soritr’aretina tokony tandremana ny fanaintainana na fahatsapana mavaivay ao an-kibo, maloiloy matetika, fahatsapana mavesatra aorian’ny sakafo, ary falain-komana. Raha maharitra ireo fambara ireo dia tsara raha manatona mpitsabo.