Fahasalamana : ‘ndeha ho fantarina ny mikasika ny « errance médicale »
Eo amin’ny marary sasany dia tsy mijanona ho fitsidihana dokotera tsotra fotsiny ny fahazoana fitiliana mazava fa lasa toy ny ady mafy lalovana mandritra ny fotoana maharitra. Io no antsoina hoe « errance médicale », izay manondro ny fotoana lava lanin’ny olona iray amin’ny fitetezana mpitsabo maro nefa mbola tsy mety fantatra mazava ny aretina mahazo azy. Maneho ny fetran’ny rafitra ara-pahasalamana sy ny fahasarotan’ny aretina sasany io toe-javatra io.
« Errance médicale » : fikarohana izay matetika ela sy mandreraka
Dingana mety maharitra volana maro, na aman-taonany mihitsy aza, ny « errance médicale ». Mandeha dokotera maro ny marary, manao fitiliana isan-karazany, mandray « diagnostiques » samihafy izay indraindray mifanohitra. Isaky ny mandeha dokotera vaovao dia misy fanantenana, nefa matetika koa no diso fanantenana rehefa mbola tsy hita ihany ny anton’ny soritr’aretina.
Matetika ireo marary manana aretina tsy fahita firy, aretina maharitra sarotra fantarina, na aretina tsy miseho ivelany no tratran’io « errance médicale » io. Lasa sarotra ny mametraka fitiliana noho ny tsy fisian’ny famantarana mazava na porofo ara-batana hita amin’ny fitsapana, eny na dia ho an’ny mpitsabo efa za-draharaha aza.
Misy vokadratsy amin’ny lafiny maro
Tsy mijanona amin’ny lafiny ara-pahasalamana ihany ny vokan’ny « errance médicale ». Miteraka havizanana ara-batana sy ara-tsaina izy io, ary vao mainka mihamafy rehefa mahatsapa ny marary fa tsy voahaino na tsy raisina am-pahamatorana.
Misy aza no very fitokisana amin’ny mpitsabo, ary mety ho tonga amin’ny fitokana-monina. Mety ho sarotra zaikaina eo amin’ny lafiny ara-bola ihany koa ny fitsidihana sy ny fitiliana miverimberina.
Ny maha-zava-dehibe ny fihainoana sy ny fiaraha-miasa
Zava-dehibe ny fihainoana ny marary rehefa tojo io toe-javatra io. Na dia tsy mbola fantatra aza ny aretina, dia efa dingana lehibe ny fihaikena ny fijalian’ny marary. Ilaina ihany koa ny fiaraha-miasa akaiky eo amin’ireo mpitsabo samihafa — dokotera ankapobeny, manam-pahaizana manokana, sy ireo mpiasan’ny fahasalamana hafa — mba hampihena ny fahatarana sy hisorohana fitiliana miverimberina tsy ilaina.
Manana anjara toerana lehibe ny ivon-toerana manokana momba ny aretina sasany, indrindra ireo tsy fahita firy, satria mampivondrona ny fahaiza-manao sy ny fitaovana. Ankoatra izany, ny fivoaran’ny fitsaboana manokana sy ny teknolojia nomerika dia mety hanampy amin’ny fahitana haingana kokoa ny aretina amin’ny ho avy.
