Fanangonana antontam-baovao : Nisitraka fampitaovana ny ministeran’ny Tontolo Iainana

Fitaovana avo lenta

Karazana fitaovana avo lenta, toy ny GPS, « drones », « disques durs externes », » imprimantes », « tablettes numériques », « powerbanks », « racks serveurs » ary « modems routeurs » no natolotry ny PNUD ho ampiasain’ireo teknisianinin’ny MEDD eny ifotony, izay mikirakira ny angom-baovao sy antontan’isa. Tafiditra ao anatin’ny fanatanterahan’i Madagasikara ny fifanarahan’i Rio izao fampitaovana izao, izay anovatsian’ny Tahirim-bola ho an’ny Tontolo Iainana Maneran-tany (GEF) vola. Tonga nanolotra ireo fitaovana ireo tamin’ny minisitry ny MEDD, Fontaine Max Andonirina, omaly 8 aogositra 2024, teny Antsahavola, ny Solontena maharitra lefitry ny PNUD eto Madagasikara, Jean François Dubuisson.

Hahafantarana ny tena zava-misy

Raha tsiahivina, ny SIGE, na « Système d’Information pour la Gestion de l’Environnement » dia tranonkala ahitana ireo antontan’isa sy angom-baovao mifandraika amin’ny tontolo iainana. Tamin’ny volana mey lasa teo izy ity no nampahafantarina tamin’ny fomba ôfisialy. Tanjona tamin’ny namolavolana azy ny fanamafisana ny haitondra ara-tontolo iainana sy hikirakirana ireo antontan’isa sy antontan-kevitra ara-tontolo iainana maro samihafa eto Madagasikara. Manan-danja goavana ity fitaovana ity, satria miainga amin’ireo angom-baovao no hahafantarana ny tena zava-misy sy ny olana eny ifotony, ka hahafahana mandray fanapahan-kevitra tena mifandraika tokoa amin’ny zava-misy sy ny filàna. Araka izany, mpisehatra ara-tontolo iainana marolafy no mamatsy ny antontam-baovao sy antontan’isa ao anatin’ny SIGE, mba ho ara-potoana ny vaovao mivoaka ao. Samy afaka mampiasa ity fitovana ity avokoa, na ireo teknisianina mpisehatra amin’ny tontolo iainana, na ny besinimaro te hahazo antontam-baovao.