Voka-pifidianana vonjimaika : Fironam-bokatra farany, 7 jona 2024
Navoakan’ny CENI izao hariva izao ny fironam-bokatra farany, entina hiandrasana ny famoahana ny vokatra vonjimaika ofisialy amin’ny fiandohan’ny herinandro ho avy io.
Distrika eo ho eo amin’ny dimampolo no naharaisana fironam-bokatra.Raha ho an’Antananarivo Renivohitra, izay andrasan’ny maro fatratra, dia ny Boriborintany voalohany ihany no misy vokatra amin’ny ampahany.
Antananarivo I (BV 166/202 – 82,18%)
Andriamanoro Augustin, kandida natolotry ny IRMAR sady Minisitry ny Serasera teo aloha, no mitarika hatreto. Nahazo ny salan’isa 38,63% ny tenany. Laharana faharoa kosa ny kandidan’ny Firaisankina sady depiote amperin’asa, Hanitra Razafimanantsoa. Nahazo ny 37,31%-n’ny vato manankery ny tenany.
Antananarivo Avaradrano (BV 359/490 – 73,27%)
Mitarika amin’ny salan’isa 42,62% ny kandidan’ny Firaisankina, Benjamina Andriamosa. Laharana faharoa hatrany, 29,61%, ny kandidan’ny IRMAR, Rijaniaina Thierry Radafindranaro. Tsy nisy fiovana firy moa ny vokatra voaray.
Antananarivo Atsimondrano (BV 483/624 – 77,40%)
Laharana voalohany hatrany i Voahangy Raharimanarivo, kandidan’ny Firaisankina, amin’ny salan’isa 42,13%. Manaraka azy kosa ny kandidan’ny IRMAR, Andriniony Ratsivahinisolo, 28,29%.
Ambohidratrimo (BV480/572 – 83,92%)
Mitarika amin’ny salan’isa 31,90% ny kandida natolotry ny Firaisankina Maminiaina Solondraibe Rabenirina. Tery dia tery hatrany ny elanelan’isa satria 30,29% no azon’ny kandidan’ny IRMAR, 30,29%.
Ankazobe (BV 166/191 – 86,91%)
Nahazo 52,44% ny kandidan’ny FIVOI, Mamy Tiana Ravelonanosy. Manaraka azy kosa ny kandidan’ny IRMAR, Eddie Ramasiherison, nahazo ny salan’isa 31,72%.
Anjozorobe (BV 194/239 – 81,17%)
Kely dia kely hatrany ny elanelana. Ho lasan’iza àry ny amboara ? Edison Razafintsihoarana, Firaisankina, no nahazo ny salan’isa ambony indrindra, 31,15%. 30% kosa no azon’i Manda Herilaza Ravelojaona, kandida avy amin’ny IRMAR.
Fenoarivobe (117/155 – 75,48%)
Miisa 6 ireo kandida nirotsaka tamin’ny fifidianana Solombavambahoaka tao Fenoarivobe, faritra Bongolava. Ireto kosa no roa voalohany : Bien Aim Arsne Randrianarisoa (IRMAR) 35,51% sy Jean Claude Arsene Randrianaivomangason (Firaisankina) 27,04%.
Tsiroanomandidy (BV 323/419 # 77,09%)
Miisa 5 ireo kandida Solombavambahoaka, ka i Harson Raholijaona, kandida tsy miankina, no tena be mpifidy. 55,08% no salan’isa azony. Lavitra tokoa ny elanelam-bato satria 15,35% no azon’ny laharana faharoa, Jose Solonirina Ndimbiarisoa, izay natolotry ny vovonana Firaisankina.