Fihaonana an-tampony Italia-Afrika : Nanamafy ny fifandraisana ara-diplômatika ny minisitry ny raharaham-bahiny
Fotoana nanararaotan’ny delegasiôna malagasy, notarihin’ny minisitry ny raharaham-bahiny vaovao, Rasata Rafaravavitafika, nanamafisana ny fifandraisana ara-diplômatika tamin’ireo firenen-kafa, ny fanatrehana ny fihaonana an-tampony Italia-Afrika. Mpitondra Fanjakana ambony maro isan-tsokajiny, araka izany, no nifampidinika tamin’ireo iraka Malagasy nanatrika izany tany Roma Italia.
« Drafitra Mattei »
Isan’ny noresahana, nandritra ity fihaonana an-tampony Italia-Afrika ity, ny momba ny fandriampahalemana, ny toe-karena ary ny famoronana asa ho an’ny tanora aty amin’ny kaontinanta afrikanina. Nodinihina ihany koa ny momba ny fotodrafitrasa, ny fanjariantsakafo, ny angovo, ny kolontsaina, ary ny fifindra-monina. Izany reherra izany dia tafiditra ao anatin’ilay antsoina hoe : « drafitra Mattei » (plan Mattei), izay iompanan’ny pôlitika ara-diplômatikan’i Italia, ary irian’ny fitondrana italianina hanatanterahana ny fifandraisana misy eo amin’ity firenena ity sy ireo firenena afrikanina. Izany dia hotanterahina ao anaty fitoviana tanteraka, fa tsy hametrahana antanan-tohatra « mpiahy sy ahiana », araka ny nambaran’i Giorgia Meloni, praiminisitra italianina. Raha tsiahivina dia solon-tenan’ny firenena afrikanina manodidina ny 20 isa no nanatrika ity fihaonana an-tampony Italia-Afrika ity.
Fanamafisana ny fiaraha-miasa
Tombony lehibe ho an’i Madagasikara ny fandraisana anjara amin’ny fihaonana an-tampony tahaka izao, ho fanamafisana ny fiaraha-miasa, hoy ny minisitry ny raharaham-bahiny, Rasata Rafaravavitafika. Teo an-kilan’ny fihaonana niraisan’ny rehetra, araka izany, dia nihaona tamina tomponandraiki-pajakana ambony maro ihany koa ny delegasiôna malagasy, toy ny minisitry ny raharaham-bahiny tanzanianina, January Makamba ; ny minisitry ny raharaham-bahiny alzerianina, Attaf Ahmed ; ny minisitry ny raharaham-bahiny ejipsianina, Rania A. El-Mashat ; ny minisitry ny ati-tany sy ny filaminana anatiny zambianina, Jacob Jack Mwiimbu ; ny minisitry ny tontolo iainana italianina, Gilberto Pichetto Fratin ; ary ny minisitry ny raharaham-bahiny italianina Antonio Tajani. Nisolo tena ny filoha Andry Rajoelina tamin’izao fihaonana an-tampony izao kosa ny minisitry ny Raharaham-bahiny, Rasata Rafaravitafika, sy ny minisitry ny Fampianarana Teknika sy ny Fanofanana aarak’asa sady mpitondra tenin’ny governemanta, Lalatiana Rakotondrazafy. Ny 28 sy 29 janoary teo moa no nanatanterahana ity fihaonana ity.
