Ireo olana madinika ao an-trano mety handany vola be raha atao tsirambina

« Robinet » na fantsona mitete

Ny rano mitete avy amin’ny fantsona, ny « robinet » na ny faritra ambanin’ny « évier » dia mety ho mora amboarina raha izy vao hita na manomboka iny. Raha avela haharitra andro na herinandro maromaro izany, dia mety hiteraka fahasimbana lehibe kokoa. Mety hiditra ao amin’ny rindrina, ny valindrihana na ny gorodona ny rano ka hiteraka hamandoana sy bobongolo. Mety hanimba fanaka sy kojakoja sasany ihany koa izany.
Noho izany, ny rano mitete kely dia mety hiafara amin’ny fanoloana ampahany amin’ny rindrina na gorodona. Anisan’ireo famantarana tokony hojerena ny tasy mando amin’ny rindrina na amin’ny tany, loko mivonto na mihintsana, fofona hamandoana tsy mahazatra, tasy mainty amin’ny rindrina ary fiakaran’ny fandaniana rano tsy misy antony mazava.

Rano miditra avy amin’ny tafo

Matetika dia tsy rarahiana firy ny tasy mando miseho amin’ny valindrihana rehefa avy ny orana. Tsy vitan’ny manaratsy endrika ny rindrina fotsiny nefa izy ireny fa mety ho fambara maneho fa misy rano miditra avy amin’ny tafo.
Raha tsy voavaha ny olana dia mety hanimba tsikelikely ny tafo, ny valindrihana sy ny rindrina ny rano. Ny hamandoana maharitra ihany koa dia mety hampitombo ny fiparitahan’ny bobongolo. Arakaraka ny haharetan’ny fidiran’ny rano moa no mety hitomboan’ny asa fanamboarana ilaina.

Triatra amin’ny rindrina izay mihamitombo

Tsy ny triatra rehetra amin’ny trano no mampidi-doza. Misy ny triatra madinika izay mety vokatry ny fahanteran’ny fitaovana na ny fiovan’ny mari-pana. Saingy tokony hojerena manokana ny triatra izay mihalalina, mihalava na miverina miseho rehefa avy namboarina.
Ny fanaovana tsinontsinona ny triatra mitombo dia mety hitarika amin’ny fanamboarana lehibe kokoa raha misy ifandraisany amin’ny hamandoana, ny fihetsehan’ny trano na ny firafitry ny fotodrafitrasa. Ny triatra lehibe, mitsivalana, na miaraka amin’ny varavarana sy varavarankely lasa sarotra sokafana no tena mila tandremana.

Ny « prise » sy ny « interrupteur » efa antitra na misy olana

Ny « prise » mafana, ny « interrupteur » mamoaka feo hafahafa na ny fofona plastika may dia tsy tokony atao tsirambina. Ireny famantarana ireny dia mety manondro olana amin’ny rafitra elektrika izay mila jerena sy amboarin’ny matihanina.
Ny fanohizana mampiasa « prise » na « interrupteur » misy olana dia mety hiteraka fahatapahan-jiro, hanimba fitaovana elektrika ary, amin’ny toe-javatra lehibe, hiteraka hain-trano. Ny fanaraha-maso na fanamboarana mialoha dia matetika mora kokoa noho ny fanarenana ny fahasimbana ateraky « dégâts électriques ».

Fantsona mandeha miadana

Raha manomboka mandeha miadana ny rano ao amin’ny « évier » na « douche », dia mety ho famantarana izany fa misy zavatra manentsina tsikelikely ny fantsona. Raha vahana haingana ny olana, dia mety ho mora ny fanadiovana azy.
Raha avela amin’izao fotsiny mandra-pijanon’ny rano tsy hikoriana intsony kosa nefa izany dia mety hiteraka fiverenan-drano sy fahasimban’ny faritra manodidina. Tokony hojerena ihany koa ny fofona ratsy miverimberina avy amin’ny fantsona.