Tambajotra sosialy: fiantraikany sy fanamby amin’ny fiainantsika ankehitriny

Inona tokoa moa ny Andro Maneran-tany ho an'ny Tambajotra Sosialy?

Noforonina tamin'ny taona 2010 ny Andro Maneran-tany ho an'ny Tambajotra Sosialy mba hanasongadinana ny anjara toerana lehibe raisin'ireo sehatra nomerika eo amin'ny fiarahamonina ankehitriny. Ity andro ity dia mampirisika ny olona tsirairay, ny orinasa ary ny fikambanana handinika ny tombontsoa, ny fanamby ary ny andraikitra mifandraika amin'ny fampiasana ny tambajotra sosialy.
An-tapitrisany maro ny olona maneran-tany no mampiasa ireo sehatra ireo isan'andro mba hifandraisana amin'ny havana sy ny namana, hizarana traikefa, hahazoana vaovao, na hampandrosoana ny asa sy ny raharaham-barotra atao.

Fiovana lehibe teo amin'ny fifandraisana

Ny iray amin'ireo fiovana lehibe indrindra nentin'ny tambajotra sosialy dia ny fomba ifandraisantsika. Amin'izao fotoana izao dia afaka mifampiresaka avy hatrany amin'ny olona any amin'ny faritra rehetra maneran-tany isika, ary afaka mizara sary, horonan-tsary na hevitra ao anatin'ny segondra vitsy monja.
Nanova tanteraka ny fomba fielezan'ny vaovao ihany koa ny tambajotra sosialy. Haingana kokoa noho ny taloha ny fiparitahan'ny vaovao, ka ahafahan'ny olona mahazo vaovao momba ny zava-mitranga eto an-toerana sy maneran-tany amin'ny fotoana tena izy.

Fitaovana matanjaka ho an'ny orinasa

Ho an'ny orinasa, ny tambajotra sosialy dia lasa fitaovana tena ilaina amin'ny fifandraisana sy ny varotra. Izy ireo dia ahafahana:
-mampahafantatra vokatra sy tolotra;
-mifandray mivantana amin'ny mpanjifa;
-mampitombo ny lazan'ny marika;
-mandinika ny filàna sy ny fanirian'ny mpanjifa;
-mamorona vondrom-piarahamonina mavitrika sy mahatoky.
Ankehitriny dia afaka mahatratra mpanjifa maneran-tany nefa tsy voatery hanana tetibola goavana ho an'ny dokam-barotra, na ireo orinasa madinika na ireo mpandraharaha lehibe.

Fisandratry ny mpamorona votoaty (créateurs de contenus »

Niteraka asa vaovao maro ihany koa ny tambajotra sosialy. Lasa manana anjara toerana lehibe eo amin'ny toekarena nomerika ny mpamorona votoaty, ny mpitaona hevitra (influenceurs), ny mpitantana vondrom-piarahamonina an-tserasera ary ireo manampahaizana manokana momba ny « marketing numérique ».
Noho ireo sehatra ireo dia maro ny olona afaka nanova ny fialam-boliny na ny talentany ho asa fivelomana, na eo amin'ny sehatry ny sakafo, ny lamaody, ny fanatanjahantena, ny fanabeazana na ny teknolojia.

Ireo fanamby ateraky ny tambajotra sosialy

Na dia maro aza ny tombontsoa entin’ny tambajotra sosialy, dia misy ihany koa ireo olana sy fanamby ateraky ny fampiasana azy ireny. Anisan'izany ny:
-ny fiparitahan'ny vaovao diso;
-ny « cyberharcèlement »;
-ny fiarovana ny fiainana manokana;
-ny fiankinan-doha amin'ny efijery;
-ny fiantraikany amin'ny fahasalamana ara-tsaina sy ny fahasalamana ankapobeny.
Ireo olana ireo dia mampahatsiahy antsika ny maha-zava-dehibe ny fampiasana ny tambajotra sosialy amim-pahendrena sy amim-pitandremana, amin'ny alalan'ny fananana fisainana mitsikera sy ny fiarovana ny « données personnelles ».

Ahoana no fomba tsara kokoa hampiasana ny tambajotra sosialy?

Mba hahazoana tombony amin'ny tambajotra sosialy sady hisorohana ny voka-dratsiny, dia tsara raha:
-ferana ny fotoana lany amin'ny tambajotra sosialy;
-hamarinina ny fahamarinan’ny ny vaovao alohan'ny hizarana azy;
-arovana ny « données personnelles »;
-hamporisihina ny fifandraisana tsara sy manaja ny hafa.
Ny fananana fahazarana tsara amin'ny fampiasana ny teknolojia dia manampy amin'ny fitazonana ny fifandanjana eo amin'ny fiainana sy ny tontolo nomerika.

Andro iray handinihana ny fampiasantsika ny tontolo nomerika

Tsy fankalazana ny tambajotra sosialy fotsiny ny Andro Maneran-tany ho an'ny Tambajotra Sosialy, fa fotoana ihany koa handinihana ny toerana raisin'ireo fitaovana ireo eo amin'ny fiainantsika andavanandro sy ny fomba ahafahantsika mampiasa azy amin'ny fomba mahasoa sy tompon'andraikitra.