Inona no mahatonga ny tanana mangovitra nefa tsy misy antony mazava ?

Fangovitana : Indraindray dia toe-javatra ara-dalàna

Misy ny fangovitanana madinika voajanahary ateraky ny vatana izay antsoina hoe « tremblement physiologique ». Matetika izy ireo tsy hitan’ny maso, saingy mety ho tsikaritra kokoa amin’ny toe-javatra sasany.
Rehefa mifandimby mihenjana sy miala sasatra haingana ny hozatra eo ambany fifehezan’ny « système nerveux » no mitranga io fangovitana io. Tsy voatery ho fambaran’aretina izy io ary mety hihamafy noho ny anton-javatra samihafa.

Fangovitan’ny tanana : mety avy amin’ny rarintsaina sy tebiteby

Ny rarintsaina sy ny tebiteby no isan’ireo antony mahatonga ny tanana hangovitra tampoka. Rehefa mitebiteby na matahotra ny olona iray dia mamokatra hormonina toy ny « adrénaline » ny vatana. Io hormonina io no manomana ny vatana hiatrika toe-javatra heveriny ho mampidi-doza na mampanahy. Izany dia mety hiteraka fangovitan’ny tanana, fitempon’ny fo haingana kokoa, hatsembohana be… Matetika dia mihena na manjavona io fangovitana io rehefa tony indray ilay olona na rehefa lasa ilay toe-javatra nampitebiteby.

Havizanana sy tsy fahampian-torimaso

Mitana anjara toerana lehibe amin’ny fiasan’ny ati-doha sy ny hozatra ny torimaso. Rehefa tsy ampy torimaso ny olona na reraka be nandritra ny andro maromaro, dia mety ho tsikaritra ho tsy « stable » toy ny mahazatra ny tanany. Izany hoe, mety somary hangovitra kely. Ankoatra izay dia mety hampitombo ny fahatsapana rarintsaina ny tsy fahampian-torimaso ka vao mainka mampitombo ny fangovitana.

Fisotroana kafeinina be loatra

Ahitana kafeinina ny kafe, dite sasany, zava-pisotro mampatanjaka ary zava-pisotro misy entona sasany. Ny kafeinina moa dia akora mampihetsika ny « système nerveux ». Noho izany, rehefa be loatra no nosotroina dia mety hiteraka fangovitan’ny tanana, tsy fahitan-tory, fitempon’ny fo haingana… Misy olona sasany mora tratr’ireo soritr’aretina ireo na dia tsy nisotro kafeinina be aza.

Fihenan’ny siramamy ao anaty ra

Rehefa midina be ny tahan’ny siramamy ao amin’ny ra (hypoglycémie) dia mamoaka hormonina ny vatana mba hamerenana ny fifandanjan-kery ilainy. Izany dia mety hahatonga fangovitana, hanoanana tampoka, hatsembohana, fanina, fahalemena ankapobeny. Mety hitranga izy io rehefa tsy mifady hanina maharitra, tsy misakafo ela, na koa amin’ny olona sasany voan’ny diabeta.

Mety ho vokatry ny fanafody sasany

Misy fanafody maro izay mety hitarika fangovitan’ny tanana noho ny voka-dratsiny (effets secondaires). Anisan’izany ny fanafody sasany ampiasaina amin’ny sohika, fahaketrahana na aretin’ny « système nerveux ». Raha vao manomboka miseho ny fangovitana taorian’ny nanombohana fanafody vaovao iray, dia tsara ny manatona mpitsabo alohan’ny hanapahana hevitra hanajanonana azy.

Aretin’ny « système nerveux »

Amin’ny tranga sasany dia mety misy ifandraisany amin’ny aretin’ny « système nerveux » ny fangovitana. Anisan’ny malaza indrindra ny aretin’i Parkinson. Na izany aza, tsy midika akory fa aretin’i Parkinson foana ny fangovitan’ny tanana. Matetika ireo aretina ireo dia miaraka amin’ny soritr’aretina hafa toy ny:
-hozatra mihamafy;
-fahasarotana amin’ny fandrindrana fihetsika;
-fihetsika miadana;
-olana amin’ny « équilibre ».

Rahoviana no tokony hanatona mpitsabo?

Tsara ny manatona mpitsabo raha:
-miverimberina matetika ny fangovitan’ny tanana;
-mihamafy tsikelikely;
-manelingelina ny asa sy ny fiainana andavanandro;
-miseho na dia tsy mihetsika aza ny tanana;
-miaraka amin’ny soritr’aretina hafa tsy mahazatra;
-maharitra herinandro maromaro nefa tsy fantatra ny antony.
Ny fizahana ara-pitsaboana dia afaka manampy hahitana ny tena antony sy hanoro fitsaboana mifanaraka amin’izany raha ilaina.