Didim-poitra zaza menavava : tsy misy atahorana ve ?

Inona no maha azo antoka ny fanaovana didim-poitra ny zaza menavava ?

Ny « période néonatale » na hoe ireo herinandro voalohany nahaterahan’ny zaza no isan’ny fotoana tsara hanaovana didim-poitra ny zanaka satria :
-Malaky kokoa ny fahamainan’ny fery (cicatrisation rapide). Mihavao malaky kokoa ny « tissus » an’ny zazamenavava ;
-Ambany kokoa ny « risques » hisian’ny fahasarotana. Maro ireo vokam-pikarohana manambara fa ambany kokoa ny fahasarotana vokatry ny famorana eo amin’ny zazamenavava raha mihoatra ny ankizy lehibebe na ny olon-dehibe ;
-« Anesthésie locale » toy ny « crème » na « bloc nerveux » dia mety ho ampy fa tsy mila atao « anesthésie générale ».

Ireo mety ho tombontsoa ara-pahasalamana

Arak’ireo vondrona ara-pahasalamana maro, toy ny « American Academy of Pediatrics », dia maro ireo tombontsoan’ny fanaovana didim-poitra ny zaza menavava. Anisan’izany ny :
-Fampihenana ny « risques » hampisy « infections urinaires », indrindra ireo mpahazo ny zazalahy kely latsaky ny 1 taona ;
-Fisorohana ny aretina toy ny « phimosis » sy ny fampihenana ny « risques » hahavoan’ny aretina azo avy amin’ny firaisana ara-nofo ;
-Fisorohana ny homamiadan’ny filahiana (na dia tsy fahita firy aza ity aretina iray ity).

Ireo mety ho « risques » sy fahasarotana

Amin’ny ankapobeny dia tena mahalana ny « risques » sy fahasarotana mitranga eo amin’ny zaza menavava natao didim-poitra. Anisan’ireo mety mitranga ny hoe :
-Mandeha rà sy misy « infections ». Isan’ireo fahasarotana fahita izy ireo fa matetika dia azo tsaboina tsara izany ;
-Ratsy endrika. Indraindray mety ho lasa ngeza na kely loatra ny hoditra nesorina ka manaratsy endrika ny filahian’ilay zaza ;
-Manaintaina. Na dia natao « anesthésie » aza ilay zazakely dia mety hahatsapa marary na tsy manorisory izy mandritra ilay fandidiana sy ny « cicatrisation » an’ilay fery.

Ireo fitandremana mikasika ny fanaovana didim-poitra ny zaza menavava

Mba hisorohana ny fahasarotana vokatry ny fanaovana didim-poitra ny zaza menavava dia misy ireo fitandremana sy fepetra tsara fantatra. Noho izany, tsy tokony atao famorana ny zaza vao teraka raha toa izy ka :
-Teraka tsy tonga volana na mbola tsy milamina tsara ny toe-pahasalamany ;
-Misy tsy fahatomombanana ny firafitry ny filahiany ;
-Misy efa tratry ny « troubles de la coagulation » na hoe « hémophilie » ao amin’ny fianakaviana akaiky azy.
Ankoatra izay dia tsy maintsy « chirurgien pédiatre » na « urologue » no manatanteraka ny didim-poitra eo amin’ny zaza menavava ary ao amin’ny toeram-pitsaboana (clinique ou hôpital) irery ihany no hanaovana izany.