Fifidianana Solombavambahoaka : Fironam-bokatra ny 4 jona (hariva)

Koa satria mbola tsy feno ny PV vita fanamarinana, tsy ferana izay mety fiovan’ny fironambokatra mikasika kandida iray na maromaro. Ny fironam-bokatra amin’ny faritra telo ireto atolotra ireto : Analamanga, Bongolava ary Itasy.

Antananarivo V (212/261 – 81,23%)

Madiva hifarana ny fanamarinana ireo PV voaray mikasika ny latsa-bato teny amin’ny Boriborintany fahadimy. Mitarika hatrany ny depiote Fetra Ralambozafimbololona, Firaisankina, amin’ny salan’isa 41,19%. Manaraka azy ny depiote Naivo Raholddina, IRMAR, nahazo ny 39,84%-n’ny vato manankery.

Antananarivo IV (124/137 – 90,51%)

Hatreto aloha dia mbola raikitra ny poa-droa ho an’ny depiote amperin’asa Todisoa Andriamampandry. Manaraka azy ny kandidan’ny IRMAR, Tantely Razanamandimbisoa, nahazo 28,81%.

Antananarivo Atsimondrano (483/624 – 77,40%)

Tsy misy fiovana firy ny vokatra azon’ny kandida tsirairay. Mitazona ny laharana voalohany i Voahangy Raharimanarivo, kandidan’ny Firaisankina, nahazo ny 42,13%-n’ny vato manankery. 28,29%-n’ireo mpifidy kosa no nandatsa-bato ho an’ny kandidan’ny IRMAR, Andriniony Ratsivahinisolo.

Antananarivo Avaradrano (BV 359/490 – 73,72%)

Mitarika amin’ny salan’isa 42,62% i Benjamina Andriamosa, kandida natolotry ny vovonana Firaisankina. Manaraka azy ny kandida natolotry ny IRMAR, Thierry Radafindranaro, nahazo 29,61%. Laharana fahatelo hatrany, 23,44% i Hajo Andrianainarivelo, natolotry ny Kolekitifa.

Ankazobe (BV 166/191 – 86,91%)

Manana ny salan’isa 52,44% hatreto ny kandida natolotry ny FIVOI, Harijao Percy Razafimandimby. Laharana faharoa kosa ny kandidan’ny IRMAR, Eddie Ramasiherison, manana ny salan’isa 31,72%.

Fenoarivobe (41/155 – 26,45%)

31,19% no salan’isa itarihan’ny IRMAR ny fifaninanana miakatra eny Tsimbazaza, amin’ny alalan’i Arsne Randrianarisoa. Manaraka azy akaiky, amin’ny salan’isa 28,60% ny kandida tsy miankina, ny dokotera Jean Claude Randrianaivomangason.

Ambohidratrimo (BV 480/572 # 83,92%)

Mitarika hatrany ny kandida natolotry ny vovonanana Firaisankina, Maminiaina Solondraibe Rabenirina. Nahazo salan'isa 31,90% ny tenany. 30,29% kosa ny mpifidy nandatsa-bato ho an'i Fenohery Johnny Rakotoarisoa, natolotry ny IRMAR.

Andramasina (BV 78/179 # 43,59%)

41,81% ny salan'isa ambony indrindra, izay azon'ny kandida mahaleotena Bina Andriamanjato. Laharana faharoa i Ralaiary Rakotamanga (IRMAR), nahazo 26,88%. 20,88% kosa no azon'i Noelilalaina Ramalanjaona (Firaisankina).

Anjozorobe (BV 194/239 # 81,17%)

Mitarika hatrany ny kandidan'ny Firaisankina, Eddison Razafintsihoarana, amin'ny salan'isa 31,15%. Manaraka azy ny kandida natolotry ny IRMAR, Manda Herilaza Ravelojaona, nahazo ny 31%-n'ny vato manankery.

Arivonimamo (BV 201/393 – 51,15%)

Lasan’ny FIVOI ny amboara hatreto. Mpifidy 78,23% be izao no nandatsa-bato ho an’i Rajerison Antoine Randriamampianina. Ny kandidan’ny IRMAR no mitana ny laharana faharoa amin’ny salan’isa 13,93%.

Tsiroanomandidy (BV 321/419 – 76,61%)

Ny kandida tsy miankina Harson Raholijaona no be mpifidy indrindra hatreto. Nahazo ny salan’isa 55,03% ny tenany. Somary lavitra ny elanelam-bato satria 15,38% no azon’i Jose Ndimbiarisoa (Tsy miankina), 12,02% ny an’i Joseph Ramiaramanana (Tsy miankina) ary 11,77% no azon’i Hajanirina Lanto Ramaherijaona (IRMAR).

Soavinandriana (BV 156/227 – 68,72%)

Miady ny lalao. 39,90% no salan’isa azon’ny kandida tsy miankina Romeo Christophe Ramanatanana, ary 37,53% no azon’ny kandidan’ny IRMAR, Harizaka Razaiharimalala. 22,57% kosa no azon’ny kandidan’ny Firaisankina, Dina Toky Iaritiana.

Miarinarivo (BV 184/273 – 67,40%)

Mitarika amin’ny salan’isa 34,65% i Fetra Rakotondrasoa, natolotry ny IRMAR. Manaraka azy ny kandida tsy miankina Bernard Anselme Ravelonjato, nahazo 27,72%-n’ny vato manankery. Laharana fahatelo kosa ny kandidan’ny Firaisankina, Zafinjaka Valimanana Ratovoherinavalona, nahazo 20,28%.