Fangatahana tanim-panjakana : Miato mandritra ny 90 andro, ho fanatsarana ny fomba fiasa
Nohamafisina nandritra ny filàn-kevitry ny minisitra notontosaina omaly 31 janoary 2024, fa miato mandritra ny 90 andro aloha ny fangatahana tanim-panjakana rehetra, araka ny toromarika avy amin’ny filoha Andry Rajoelina.
Hovaina ny didy aman-dalàna
Tsy maintsy amafisina ny ezaka hotanterahina eo amin’ny lafiny fananan-tany eto Madagasikara, izay tena mampikaikaika ny vahoaka, hoy ny tatitry ny filàn-kevitry ny Minisitra. Tsy maintsy hirosoana, araka izany, ny fanatsarana ny fomba fiasan’ny minisitera eo amin’ny sampandraharahan’ny fananan-tany, mba hanafoanana ny fanodikondinana ny tanim-panjakana sy ny tambazotra mpanao hosoka eo amin’io sehatra io. Ao anatin’ny 90 andro no hanatanterahana ny fanentanana amin’ny fanavaozana ireo fangatahana tanim-panjakana, amin’ny alalan’ny fanovana ireo didy aman-dalàna izay mifehy izany. Izany no antony ampiatoana ny fangatahana tanim-panjakana rehetra mandritra io fe-potoana io. Ao anatin’izany, ireo minisitera izay manana tetikasam-panjakana eny amin’ny tanim-panjakana dia mila manao fanamarinana ireo taratasy rehetra mifandraika amin’izany, mba tsy hisy fifanipahana. Tanjona, araka ny filàn-kevitry ny Minisitra hatrany, ny hisian’ny mangaharahara tanteraka eo amin’ny tanim-panjakana rehetra.
Hotohizina ny fizarana kara-tany
Asa hotanterahina ao anatin’ny fanatsarana ny sampandraharahan’ny fananan-tany ny fandrafetana ny drafitra momba ny fananan-tany (Plan Local d’Occupation Foncière), izay ho hampiharina manerana ny Nosy, mba hampirindra ny fitsinjarana ny tanim-panjakana. Tsy maintsy hampadalovina eo anivon’ny Filàn-kevitry ny Ministra izany ary hampiasaina ny teknolojia sy ny haitao ara-kajy mirindra ahafahana manara-maso izany fitsinjarana izany. Ankoatra izay dia hotohizina ny fizarana kara-tany, amin’ny alalan’ny tetikasa CASEF izay iarahana miasa amin’ny Banky iraisam-pirenena. Tanjona ny hizara kara-tany miisa 1.400.000 mialohan’ny fiafaran’ny volana Jona 2024. Nanome toromarika moa ny Filohan’ny Repoblika, mba hanamafisana ny ady atao amin’ireo tambazotra mpisoloky sy mpanodinkodina tanim-panjakana sy tanin’olon-tokana. Ny fametrahana ireo fanovana ireo, hoy izy, no ahafahana manatanteraka ny drafi-pampandrosoana izay imasoana hanakaiky ny vahoaka. Nanamafy ny Filoha fa tsy hisy indrafo amin’ny fangalarana sy fanodikodinana tany, sy izay mety ho endrika kolikoly rehetra manodidina izany.
