ENMG Tsaralalàna : Mpianatra ho Mpitsara 100 mianadahy no vita fiofanana

100 mianadahy izy ireo no nanao fianianana androany 24 janoary 2024, rehefa niofana nandritra ny 24 volana teo anivon’ny Sekolim-pirenena manofana ho Mpitsara sy Mpiraki-draharaha (ENMG). Ny 60 tamin’izy ireo dia mpianatra ho Mpitsara ny ady ifanaovan'ny olon-tsotra, ny 20 dia mpianatra ho Mpitsara ny ady ifanaovana amin'ny Fanjakana ary ny 20 kosa dia mpianatra ho Mpitsara mikasika ny fitantanana ny volam-panjakana. Araka izany, izy zato mianadahy ireto no ho avin’ny Fitsarana eto Madagasikara.

Fianianana santatra moa no nataon'izy ireo, mialohan'ny handehanan’izy ireo hizatra asa eny anivon'ny sampam-pitsarana manerana an'i Madagasikara, izay vao tena handray ny asa maha-Mpitsara azy. Nitarika ny lanonam-pitsarana manetriketrika, nandraisana ny fianianan’ireto mpianatra Mpitsara vao vita fiofanana ireto, ny Filoha Voalohan'ny Fitsarana Tampony sy ny Tonia Mpampanoa Ambony eo anivon'ny Fitsarana Tampony.