"Ankizivavy Mianatra, Vehivavy Miavotra" : Fahombiazana ny hetsika 100 andro

Fanabeazana, fanomezana asa mendrika ary ady amin’ ny herisetra

Nimasoana nandritra izay 100 andro izay ny fanentanana ny amin'ny ahafahan'ny ankizivavy mandeha an-tsekoly, ny fampiofanana arak'asa ary indrindra ny fandraisana an-tanana ireo vehivavy niharan'ny herisetra. Nanamarika tanteraka izany hetsika izany ihany koa ny nanampiana sy nitadiavana vahaolana mba hahaleotena ny Vehivavy amin'ny fihariana ara-toekarena.
Nanome voninahitra ity fotoana ity ny vadin'ny Filoham-pirenena, Ramatoa Mialy Rajoelina izay nitarika ity hetsika ity niaraka tamin'ny Banky Iraisam-pirenena. Tsy adinony ny nanamafy fa "Ny fianarana no hany lalana ho an'ny Fampandrosoana ara-toekarena eto amin'ny firenena". Tonga nanotrona ity fotoana ity ihany koa ny Filohan'ny Antenimieram-pirenena, Ramatoa RAZANAMAHASOA Christine, sy ireo mpikambana ao amin'ny Governemanta. Anisan'izany Ramatoa RABARINIRINARISON Rindra Hasimbelo, Minisitry ny Toekarena sy ny Fitantanam-bola.

Ezaka mitohy, vokatra maharitra

Araka ny nambaran'ny Solontena Maharitry ny Banky Iraisam-pirenena eto Madagasikara, Ramatoa Marie Chantal Uwanyiligira, maherin'ny 25%-n'ny vehivavy malagasy no mbola tsy mahay mamaky teny, mikajy ary manoratra. Mbola ambony ihany koa ny tahan'ny herisetra. Tsy adino ny zo tsy mitovy amin'ny an'ny lehilahy eo amin'ny mari-karama. Mba ahitana vahaolana maharitra, mbola mitohy ny fandaharan'asa iarahan'ny fanjakana malagasy amin'izy ireo ho an'ny fahaleovan-tenan'ny ankizivavy sy ny Vehivavy. Entina eny anivon'ny Filan-kevimpitantanan'ny Banky Iraisam-pirenena moa izany.