Ministeran'ny fiarovam-pirenena : Nanolotra fandaharan'asa 2023 ho an'ny Tafika Malagasy
Nanolotra ny fandaharan’asa sy ny fomba fiasa ho an’ny taona 2023 tamin’ireo tompon’andraikitra ambony eo anivon’ny Foloalindahy Malagasy ny ministry ny Fiarovam-pirenena tao amin’ny Cercle Mess Soanierana. Nanotrona azy ireo tamin’izany ny Praiminisitra Ntsay Christian.
Nankasitraka ny ezaka vitan’ny Foloalindahy hatrizay ny Lehiben’ny governemanta, nandritra ny fandraisam-pitenenana nataony. Nisy ny ezaka hoy izy matoa misy ny vokatra ; mila fitohizana izany ary mila miorina amin’ny fifamenoana ny fandraisana andraikitra rehetra ho tombotsoa ambonin’ny firenena.
Nohamafisin’ny Praiminisitra fa natao hampatanjaka bebe kokoa ny Foloalindahy ny fanitsiana ny rafitra napetraka.
Hiatrika fifidianana isika amin’ity taona ity hoy ihany ny Praiminisitra ary maro ny ambana ho atrehina ka mila mijoro ny Foloalindahy ary hibanjina izay mahasoa ny firenena.
