Faritra Betsiboka : Namaky bantsilana ny maharary azy ny vahoaka

Tao Tsaratanàna no nananterahana izany ka ny Jeneraly Andriamanana Solofonirina Maherizo, talen’ny Serasera sy ny fifandraisana amin’ny any ivelany ao amin’ny Sekreteram-panjakana miadidy ny Zandarimaria sy ny Jeneraly Miasa Manohizara Toussaint, talen’ny Fifandraisan-davitra sy fampitam-baovao eo anivon’ny Fibaikoana ny Zandarimaria no nitarika ny delegasiona avy aty Antananarivo. Ny marainan’io Alatsinainy io dia nisy ny fikaonan-doha notontosain’ireo tompon’andraikitry ny Zandarimaria ireo niaraka tamin’ireo tompon’andraikim-panjakana tao an-toerana. Izany fikaonan-doha izany dia naompana indrindra tamin’ny fanamafisana ny fiaraha-miasa eo amin’ny fametrahana ny fandriam-pahalemana. Nanome toky ireo tompon’andraikitra ireo fa vonona tokoa hiara-hiasa na ara-kevitra na ara-pitaovana na ara-bola mihitsy aza amin’ny fametrahana izany tanjona izany. Isan’ny nodinihina tamin’izany ny fiaraha-miasa eo amin’ny Zandarimaria sy ny olom-boafidy sy olom-boatendry (Loholona, Depiote, Préfet, Lehiben’ny distrika, Lehiben’ny Polisy, Ben’ny tanàna,…). Teo ihany koa ny fiaraha-miasan’ny Zandarimaria sy ny vahoaka ka tafiditra ao anatin’izany ireo Ray aman-dReny ara-drazana sy Ray aman-dReny ara-panahy. Ny folakandro dia natokana nihaonana nivantana tamin’ireo vahoaka sy nanomezana azy ireo sehatra mba hamaky bantsilana ny sakana izay mitarika ny tsy fandriam-pahalemana. Vokany, tsy nisalasala ireto farany nametraka fanontanina sy nampahalala ireo tompon’andraikitra ny olana sy ny maharary azy. Isan’izany ny fisian’ireo zandary sy ireo tompon’andraikim-panjakana sasany manao kolikoly, mifandray tendro amin’ny dahalo, sy manao fanamparam-pahefana. Teo anatrehan’izany dia nanome toky ireo tompon’andraikitra avy amin’ny Zandarimaria ireo fa vaindohan-draharaha ny fanadiovana ny ao anatin’ity hery ity fa tsy natao fieren-jiolahy na mpano ratsy ny Zandarimaria. Nisy moa ny fanomezana laharan-tariby maromaro mba ahafahan’ny be sy ny maro mampahafantatra sy mampita izay tsy mety hitan’izy ireo ataon’ny Zandary eo am-panatanterahana ny asany.

T.M.