Ireo vokatsoa azo avy amin’ny fihinanana « huîtres »

Hazan-drano manankarena otrik’aina ny « huîtres »

Maro ireo vokatsoa entin’ny fihinanana « huîtres » eo amin’ny vatana sy ny fahasalamana. Manampy betsaka amin’ny fanatsarana ary mandrisika ny fiasan’ny vatana ity karazana hazan-drano ity noho izy manankarena otrik’aina. Ahitana « vitamines », « oligo-éléments » sy « minéraux » amin’ny tahany ambony ao amin’ny « huîtres ». Ankoatra izay dia maro ihany koa ireo singa ilain’ny vatana hita ao aminy, toy ny « cuivre », « fer », « zinc », « vitamines C, D et E », « riboflavine » … Anisan’ireo vokatsoa azo avy amin’ny fihinanana « huîtres » ny :

Fiarovana ny fahasalaman’ny fo

Toy ireo karazana trondro sy ireo hazan-drano maro dia manankarena « oméga 3 » izay « acides gras » ilain’ny vatana ny « huîtres ». Ny « oméga 3 » moa dia miasa amin’ny fiarovana ny lalan-drà sy fo amin’ny alalan’ny fampihenana ny fiangonan’ny « plaques » izay mety hanentsina ny lalan-drà. Ny « vitamine E » etsy andaniny dia manamafy ireo « membranes cellulaires » izay miaro amin’ireo aretin’ny fo.

Fanatsarana ny fikorian’ny rà

Ny « potassium » sy ny « magnésium » hita ao amin’ny « huîtres » dia miara-miasa amin’ny fanatsarana ny fikorian’ny rà sy ny tosi-drà. Ireo singa ireo dia manampy ny rà amin’ny fitondrana ny « oxygène » ao amin’ny vatana. Etsy andaniny ny « fer » hita ao amin’ny « huîtres » dia mampitombo ny famokarana « globules rouges » ao amin’ny rà ka miaro indrindra amin’ny tsy fahampian’ny rà na « anémie ».

Manampy amin’ny fampihenana vatana

Ny « huîtres » dia sakafo tsy be kaloria ary tsy matavy ka mety tsara ho an’ny olona izay te hampihena vatana. Ahitana « protéines » betsaka lavitra nohon’ny akoho ihany koa ao amin’ny « huîtres ». Ny « protéines » dia anisan’ireo singa manome fahatsapana voky ao amin’ny vatana. Izany hoe rehefa mihinana ity karazana hazan-drano ity dia ho mora voky sy tsy mora mahatsiaro noana. Hoanina miaraka amin’ny vinaigitra kely na voasary makirana kely kosa nefa ny « huîtres » raha te hihena fa tsy ampiharana amin’ny sakafo matavy toy ny dibera na « mayonnaise ».

Mila mitandrina tsara kosa nefa rehefa mihinana « huîtres ». Tandremana mba mpivarotra azo antoka no hividianana izany. Jerana tsara hoe mbola velona sy madio tsara ireo entana amidiny. Mankarary ary mety mahafaty ny fihinanana « huîtres » efa maty na misy loto.