Inona avy ireo famantarana tokony ho marihina alohan’ny hanatonana mpitsabo?
Alohan’ny handehanana any amin’ny mpitsabo dia tena ilaina ny manamarika na mandray an-tsoratra ireo soritr’aretina tsapa. Na dia toa tsy dia lehibe aza ny famantarana sasany dia mety hanampy betsaka ny dokotera ny fahafantarana izany amin’ny fizahana ara-pahasalamana ataony sy hamaritany ny fitiliana ary ny fitsaboana mifanaraka amin’izany. Araho eto àry ny andinindininy mikasik’izany.
Soratana mazava tsara ireo soritr’aretina
Atomboka amin’ny famaritana izay zavatra tena tsapana: fanaintainana, havizanana, tazo, kohaka, maloiloy, fanina, fahasemporana, olana amin’ny fandevonan-kanina, tsy fahitan-tory, na fiovana hafa tsy mahazatra.
Andramana faritana hoe oviana no nanomboka ilay soritr’aretina, raha mitohy tsy tapaka izy na miseho tsindraindray, ary raha mihamafy, mihena na tsy miova.
Ohatra, raha tokony hilaza fotsiny hoe « marary kibo aho », dia tsara kokoa ny manazava hoe: « Nanomboka telo andro izay ny fanaintainana, indrindra rehefa avy misakafo, ary mihamafy kokoa amin’ny hariva. »
Marihana ny hatetiky ny fisehoany sy ny hamafin’ny soritr’aretina
Ho an’ny soritr’aretina sasany, zava-dehibe ihany koa ny fahafantarana hoe impiry izy no miseho. Soratana, ohatra, ny hatetiky ny fisehoany ao anatin’ny iray andro na herinandro. Toy izay ihany koa ny hamafiny.
Raha fanaintainana no tsapa, dia azo omena isa manomboka amin’ny 0 ka hatramin’ny 10 ny hamafiny: 0 midika hoe tsy misy fanaintainana ary 10 midika hoe fanaintainana tena mafy tsy zaka. Manampy ny dokotera hahafantatra ny fiovan’ilay fanaintainana izany.
Fantarina izay antony mampipoitra na mampihena ny soritr’aretina
Andramana dinihana ny toe-javatra mampihetsika ilay soritr’aretina. Mifandray amin’ny sakafo ve? Mipoitra rehefa manao ezaka ara-batana, rehefa mitebiteby, rehefa tsy ampy torimaso, sa rehefa mipetraka na mandry amin’ny toerana iray?
Marihana ihany koa izay zavatra toa mampihena azy, toy ny fialan-tsasatra, fisotroana rano, fiovan’ny toerana, sakafo, na fihinanana fanafody. Izany dia afaka manampy ny dokotera hamantatra ireo antony mety misy ifandraisany amin’ny soritr’aretina.
Marihina ireo fiovana tsy mahazatra
Tokony holazaina amin’ny dokotera ihany koa ireo fiovana hita, na izay heverina fa tsy misy ifandraisany amin’ny antony hanatonana azy aza. Anisan’izany ny fiovan’ny fahazotoan-komana, ny fihenan-danja na fitomboan-danja tsy nampoizina, ny fiovan’ny fivalanana, ny olana amin’ny fivoahan’ny pipy, ny havizanana tsy mahazatra, ny fiovan’ny torimaso na ny fisehoan’ny fanaintainana vaovao.
Tsara ihany koa ny manamarika izay soritr’aretina vaovao niseho hatramin’ny fotoana nanaovana fizahana farany.
Omanina ny mombamomba ireo fanafody raisina
Alohan’ny fotoana hijerena dokotera dia mila soratana ireo fanafody raisina, anisan’izany ny vitamina sy ny fanampin-tsakafo, ary ny fatrany. Lazaina ao ihany koa raha misy fanafody vao najanona.
Tsy adinoina ny mampahafantatra ny dokotera raha misy fanafody tsy zaka na mampisy « allergie », na efa nisy fanehoan’ny vatana tsy nety tamin’ny fanafody sasany.
