Tontolo iainana : Mpandray anjara 15.000 isa no miatrika ny COP16 any Kôlômbia

Mpandray anjara 15.000 isa

Iray amin’ireo hetsika lehibe indrindra eran-tany momba ny fiarovana ny karazanjavamananaina ny COP. Mpandray anjara manodidina ny 15.000 isa avy amin’ny firenena 190 isa maneran-tany no miatrika izany any an-toerana, ahitana filoham-panjakana miisa 12, minisitra 103 ary mpanao gazety an’arivony. Manana solontena mandray anjara amin’izany i Madagasikara. Tanjon’ny COP16 ny hampiroboroboana ny fiaraha-miasa iraisampirenena, ny hahitana fifanarahana momba ny fampiasam-bola, hahafahana miaro ny natiora, sy ny fanamafisana ny pôlitika momba ny tontolo iainana maneran-tany, ao anatin’ny fanatrarana ny tanjona 23-n’ny Rafitra maneran-tany Kunming Montreal 2030, sy ny tanjona lehibe ho an’ny taona 2050.

Araka izany, hodinihina mandritra ny 10 andro hanatanterahana ny fihaonana an-tampony, ny fomba hamerenana amin’ny laoniny ny tany sy ny ranomasina, izay mihasimba hatrany, ao anatin’ny fiarovana ny planeta sy ao anaty fanajana tanteraka ny zon’ireo mponina tompon-tany sy ny vondron’olona ifotony. Tanjona lehibe indrindra amin’izany ny hanatanterahana ny tanjona faha-3 ao amin’ny fifanarahan’i Kunming-Montréal antsoina hoe : 30 amin’ny 30 (30/30), izay milaza ny amin’ny tokony hiarovana ny 30%, fara-fahakeliny, amin’ny amin’ny faritra an-tanety, an-drano sy an-dranomasina maneran-tany, hatramin’ny taona 2030.

Fanetsehana loharanom-bola

Nandray anjara fitenenana, nampitain-davitra, ny sekretera jeneralin’ny Firenena Mikambana, António Guterres, nandritra ny lanonam-panokafana ity fihaonana an-tampony ho an’ny karazanjavamananaina ity. Nandritra izany no namporisihany ireo firenena rehetra maneran-tany mba « hamitram-pihavanana amin’ny natiora » ary hanamafy ireo drafitra ahafahana mampitsahatra ny fahapotehan’ny toeram-ponenan’ireo zavamananaina, miaro ireo karazanjavamananaina ahiana ho lany tamingana ary hitandro ny rohivoahary sarobidy. « Raha tiantsika hiaina ny olombelona, dia mila mivelatra ny zava-boahary », hoy i António Guterres. Noho izany, rehefa mifarana ny COP16, dia tokony hisy fampiasam-bola goavana ho tapaka, mandritra ireo atrikasa hotanterahina, tokony hisy tahirim-bola hiforona, tokony hisy fanetsehana ireo loharanom-bola miankina sy tsy miankina amin’ny Fanjakana, mba hahafahana tena manatratra ireo tanjona fiarovana ny tontolo iainana izay kendrena ireo, hoy hatrany ny sekretera jeneralin’ny Firenena mikambana.

Amin’ny 1 novambra izao moa no hifana ity fihaonana an-tampony momba ny karazanjavamananaina tanterahina any Cali Kôlômbia ity.