Ireo fiovana ara-batana mahazatra mety mitranga aorian’ny faha-40 taona

Fiovana ara-batana aorian’ny faha 40 taona : mihena tsikelikely ny hozatra

Manomboka mihena tsikelikely ny haben’ny hozatra sy ny tanjany rehefa mandroso ny taona. Efa mety hanomboka hatrany amin’ny faha-40 taona izany fiovana izany.
Mety hahatsapa ho sahirana kokoa mitondra entana mavesatra na maharitra ilay olona na mitaky fotoana ela kokoa ny vatana ialana sasatra aorian’ny ezaka ara-batana.
Ny fanaovana fanatanjahantena tsy tapaka, indrindra ireo fanazaran-tena mampatanjaka hozatra, dia afaka manampy betsaka amin’ny fampihenana io dingana ara-dalàna amin’ny fahanterana ireo.

Miadana kokoa ny metabolisma

Maro ny olona mahatsikaritra fa lasa mora mitombo lanja kokoa aorian’ny faha-40 taona raha ampitahaina amin’ny tamin’ny fahatanorana, na dia tsy niova firy aza ny fomba fisakafoana.
Ny fihenan’ny hozatra no antony iray mahatonga izany, satria mandany angovo betsaka kokoa noho ny tavy ny hozatra, na dia rehefa miala sasatra aza ny vatana. Lasa somary araka izany ny filàn’ny vatana kaloria isan’andro.
Noho izany, ireo fahazarana ara-tsakafo izay tsy niteraka olana taloha dia mety hahatonga fitomboan-danja rehefa mandeha ny taona.

Mitombo ny tavy eo amin’ny kibo

Na ny lehilahy na ny vehivavy dia samy mety hahita fiovana eo amin’ny toerana itahirizan’ny vatana tavy.
Aorian’ny faha-40 taona dia mahazatra ny fahitana fitomboan’ny tavy eo amin’ny kibo, na dia amin’ireo olona tsy matavy aza. Isany mitana anjara toerana lehibe amin’izany ny fiovan’ny hormonina.
Tsy resaka bika aman’endrika fotsiny ihany nefa izany, satria ny tavy be loatra eo amin’ny kibo dia mampitombo ny « risques » mety hitrangan’ny aretim-po sy ny olana ara-metabolisma.

Mihamalemy sy mihamanify ny hoditra

Anisan’ny fiovana hita maso indrindra aorian’ny faha-40 taona ny fiovan’ny hoditra.
Rehefa mihantitra ny olona dia mihena ny famokaran’ny vatana « collagène » sy « élastine ». Vokatr’izany dia lasa manify kokoa, maina kokoa ary tsy dia mihenjana intsony ny hoditra. Mora miseho ihany koa ny ketrona sy ny tsipika madinika.
Mety hanafaingana izany fiovana izany ihany koa ny tara-masoandro, ny fifohana sigara ary ny anton-javatra samihafa avy amin’ny tontolo iainana.

Mihamanify ny volo

Miova ihany koa ny volo rehefa mandeha ny taona.
Mihena ny hafainganam-pitombony ary mihamanify tsikelikely izy. Mety ho tsapa fa nihena ny hateviny raha oharina tamin’ny taloha.
Amin’ny lehilahy dia mety hihombo ny fahasolana ateraky ny « génétique ». Amin’ny vehivavy kosa dia mora manify kokoa ny volo rehefa manakaiky na mandalo « ménopause ».

Miova ny fahitana

Rehefa mihoatra ny 40 taona dia maro no manomboka sahirana mamaky soratra kely na mahita zavatra akaiky.
Izany toe-javatra izany no antsoina hoe « presbytie ». Izy io dia vokatry ny fihenan’ny fahafahan’ny mason’olombelona mampifantoka ny masony amin’ny zavatra akaiky.
Maro moa no lasa manalavitra boky na finday rehefa mamaky mba ahitana kokoa ny soratra.

Mihena tsikelikely ny fandrenesana

Mety ho sarotra kokoa ny mandre feo avo na feo maranitra sasany rehefa mandroso ny taona.
Miadana ny fivoaran’io fiovana io ka matetika tsy dia voamarika avy hatrany. Mety hahatsapa fahasahiranana amin’ny fanarahana resadresaka ao anaty toerana be tabataba ny olona sasany.
Amin’ny ankapobeny dia vokatry ny fahanteran’ny taova ao anaty sofina no mahatonga izany.

Rahoviana no tokony hanatona dokotera?

Na dia ara-dalàna aza ny ankamaroan’ireo fiovana ireo dia misy famantarana sasany izay tsy tokony heverina fotsiny hoe “vokatry ny fandrosoan’ny taona”. Tsara arak’izany ny manatona mpitsabo raha mahatsikaritra :
-Mihena tampoka ny lanja nefa tsy niniana.
-Havizanana tsy mahazatra sy maharitra.
-Fanaintainana mafy na tampoka.
-Fahitana na fandrenesana mihena tampoka.
-Olana amin’ny fitadidiana izay manelingelina ny fiainana andavanandro.
-Sempotra tsy mahazatra.