Ara-dalàna ve ny fisian’ny « crampes » matetika amin’ny tongotra ?
Ny « crampes » amin’ny tongotra dia fihejanan’ny hozatra tampoka, tsy niniana ary matetika marary. Mety hitranga amin’ny fotoana rehetra izy io, fa amin’ny alina na aorian’ny fanaovana ezaka ara-batana no tena miseho. Matetika dia tsy dia mampanahy ny « crampes » amin’ny tongotra raha indraindray ihany no mitranga. Raha miverimberina kosa dia mety misy antony tokony hojerena.
Inona no mahatonga ny « crampes » amin’ny tongotra ?
Maro ny antony mety mahatonga ny « crampes » amin’ny tongotra :
-Tsy fahampian-drano. Rehefa tsy ampy rano ny vatana dia tsy mandeha tsara ny asan’ny hozatra. Ny hafanana, ny hatsembohana be na ny tsy fisotroana rano ampy dia mety hampitombo ny « risques » hisian’ny « crampes ».
-Tsy fahampian’ny mineraly. Mila mineraly sasany ny hozatra mba hiasa tsara. Ny tsy fahampian’ny « magnésium », « potassium » na « calcium » dia mety hampisy « crampes » matetika.
-Havizanana ara-batana. Ny fandehanana lavitra, ny fanatanjahan-tena mafy na ny fijoroana ela dia mety hahatonga ny hozatra ho reraka ka hiteraka « crampes ».
-Olana amin’ny fikorianan’ny rà. Raha tsy mandeha tsara ny rà dia mety tsy ampy ny « oxygène » tonga any amin’ny hozatra, ka mety hiteraka fihenjanana tampoka.
-Kiraro tsy mety. Ny kiraro tery loatra na tsy manohana tsara ny tongotra dia mety hampitombo ny tsindry amin’ny hozatra sy hitarika « crampes ».
Rahoviana no tokony hanahy?
Tsy voatery ho fambaran’aretina lehibe ny fisian’ny « crampes » matetika amin’ny tongotra, saingy tsara ny manatona mpitsabo raha:
-miseho imbetsaka isan-kerinandro izany;
-tena maharary;
-miaraka amin’ny fahalemen’ny hozatra;
-mahatsapa fanina na mangotsongotsoka;
-miseho nefa tsy fantatra ny antony.
Indraindray dia mety misy ifandraisany amin’ny aretin’ny lalan-drà, ny « système nerveux » na olana hafa ara-pahasalamana ny « crampes » miverimberina.
Ahoana no atao hisorohana azy?
Ireto misy fahazarana tsotra afaka manampy:
-Misotro rano ampy isan’andro.
-Mihinana sakafo manankarena « potassium » (akondro, zavoka, vomanga), « magnésium » (amandy, voa isan-karazany, legioma maitso) ary « calcium ».
-Manao fanazaran-tena manalefaka sy manenjana ny tongotra sy ny ranjo.
-Mampiasa kiraro mampahazo aina sy mety amin’ny tongotra.
-Misoroka ny fijoroana na fipetrahana ela amin’ny toerana iray.
Inona no atao rehefa tratran’ny « crampes » ny tongotra?
Raha sendra misy « crampes » ny tongotra dia:
-Ahintsano moramora sy ahenjana mankany aminao ny rantsan-tongotra.
-Ory moramora ilay hozatra marary.
-Mandehana miadana mandritra ny minitra vitsivitsy.
-Asio hafanana malefaka mba hanampy ny hozatra ho tony sy hiala sasatra.
