Miasa avy any an-trano : ireo hadisoana tokony hialàna
Miroborobo be tato anatin’ny taona vitsivitsy ny asa atao avy any an-trano na « télétravail » noho izy io manome fahalalahana sy fanamorana betsaka ho an’ny mpiasa maro. Na izany aza, tsy voatery handeha ho azy ny fiasana ao an-trano. Raha tsy voalamina tsara, dia mety hisy fiantraikany ratsy amin’ny vokatra azo, ny fifandanjan’ny fiainana, ary ny fahasalamana mihitsy aza. Ireto avy ireo hadisoana lehibe tokony hialàna mba hahombiazana amin’ny asa atao ao an-trano.
Tsy manokana toerana hiasana
Iray amin’ireo hadisoana mahazatra ny miasa eo ambony fandriana na eo amin’ny seza fandraisam-bahiny. Mety hahafinaritra izany, nefa manelingelina ny fifantohana ary mampifangaro ny fiainana manokana sy ny asa. Zava-dehibe ny manokana toerana iray hiasana, na dia kely aza, mba hanamora ny fifantohana sy hanamarihana mazava fa io no toerana iasana.
Tsy manana fandaharam-potoana mazava
Raha tsy voafaritra ny ora iasana, dia mora mikorontana ny tontolo andro. Mety hifoha amin’ny ora tsy mitovy isan’andro, hiasa hatramin’ny alina, na haka fiatoana lava loatra. Ny fametrahana fandaharam-potoana mazava (ora hanombohana, fiatoana, ora hamaranana) dia manampy amin’ny fifehezan-tena sy fahombiazana.
Tsy maka aina mandritra ny asa
Maro no mihevitra fa vao mainka mahomby raha miasa tsy an-kijanona, kanefa tsy marina izany. Mila fotoana hialana sasatra ny atidoha. Ny fakàna aina kely matetika dia manampy amin’ny fitazonana fifantohana sy mampihena ny adin-tsaina. Afaka mitsangana mandeha kely, manao fanazaran-tena tsotra, na miala amin’ny efijery vetivety.
Mora voasariky ny fanelingelenana
Any an-trano dia maro ny zavatra manelingelina: fahitalavitra, finday, raharaha an-trano, tambajotra sosialy… Raha tsy voafehy izy ireny, dia mety handany fotoana betsaka. Zava-dehibe ny mifehy izany, ohatra amin’ny fanesorana ny « notifications » na fametrahana fotoana manokana hanaovana zavatra hafa.
Tsy mifandray amin’ny mpiara-miasa
Mety hiteraka fahatsapana ho mitokana ny asa atao lavitra na « travail à distance ». Raha tsy ampy koa ny fifandraisana amin’ny mpiara-miasa, dia mety hiteraka tsy fifankahazoana na fahatarana amin’ny asa. Noho izany, ilaina ny mifandray tsy tapaka amin’ny alalan’ny antso, hafatra na fivoriana an-tserasera.
Tsy mametra ny ora iasana
Rehefa miasa ao an-trano dia mety hieritreritra fa tokony ho vonona hiasa foana. Vokany, lasa miasa be loatra ka tsy mahavita miala sasatra. Tokony hametraka fetra mazava anefa ny tsirairay amin’ny fanajana ora iasana sy fisorohana ny fijerena mailaka ivelan’ny ora fiasana.
Tsy miraharaha ny fahasalamana
Farany, ny mipetraka ela loatra, ny sakafo tsy voalanjalanja, na ny tsy fanaovana fanatanjahan-tena dia mety hanimba ny fahasalamana. Tokony hanana fahazarana tsara ny olona miasa ao an-trano: mihetsika matetika, mihinana sakafo ara-pahasalamana, ary mikarakara ny vatany.
