Antsiranana : « Trois Baies », toerana mahavariana, ranomasina madio sy fasika mamirapiratra
Ranomasina miloko maitso manopy manga (vert turquoise) sy fasika miloko fotsy mangatsakatsaka. Toy izany avokoa no hita vantany vao miditra ireo « Baie » telo mahavariana ao Antsiranana ao. Ao anatin’izany ny « Baie de Sakalava », ny « Baie des Dunes » ary ny « Baie de Pigeon ». Samy manana ny mampiavaka azy kosa anefa izy telo ireo. Toerana telo samy manana ny maha izy azy sy ny misy azy saingy mifandray. Raha jerena amin’ny sary dia toa mifampibaby ireto baie telo ao Antsiranana ireto.
Somary miala alavitra kely ny renivohitra kosa anefa no ahitana azy ireo. Mandeha eo ho eo amin’ny 20km eo vao tonga, satria ao anatin’ny Antsiranana II, izay manaraka lala-tany any amin’ny « circuit Ramena »
Baie de Sakalava : toerana fanaovana « kitesurf »
Ny « Baie de Sakalava » no faheno matetika satria ity toerana ity dia malaza amin’ny fanaovana fanatanjahan-tena anaty rano ; indrindra ny « kitesurf ». Manana rivotra mahery rahateo izy ka mahasarika ireo vahiny mpankafy ireny karazana fialamboly ireny. I Antsiranana ihany koa dia malaza amin’ny « varatraza » ka manana izany betsaka ny ao amin’ny Baie de Sakalava. Fepetra iray tena ilain’ireo mpanao « kitesurf » indrindra ny rivotra ka izay no mahabetsaka azy ireo eny.
Malalaka ihany koa ny toerana ka mandrisika ireo mpanatalenta amin’ny filalaovana « voile ». Samy eo avokoa na ireo vao mianatra, na ireo efa matihanina amin’ny « kitesurf ». Eny an-toerana ihany koa amin’izao fotoana izao dia efa misy toeram-pianarana momba ity fanatanjahan-tena iray ity.
Madio ny fasika ary miloko fotsy sy malefaka rehefa hitsahina. Malalaka ny ranomasina izay mirefy eo ho eo amin’ny 2.2Km2 eo ny velarany.
Copyright Image : © Baie de Sakalava - Moov
Baie des Dunes : Toerana fankafizana natiora
Lavidavitra kokoa, mbola mianavaratra indray no ahitana ny Baie des Dunes izay mampiseho tontolo kanto sy manaitra ny maso amin’ireo mpandalo. Manana tora-pasika madio sy mivelatra be izy, ahitana dongom-bato sy hazo « filao » maro. Tsy dia ahitana olona ihany koa satria tsy ny hilomano loatra no antondian’ireo mpitsidika fa ny hanome fahafaham-po ny maso sy ny saina. Rehefa tonga ao tokoa mantsy dia mahafinaritra kokoa ny mandeha tongotra mamakivaky ireo fasika malefaka sy fotsy madio ; izay hanasan’ireo tompon-tanàna rahateo izany.
Raha ny fanazavana dia misy soka-dranomasina tonga eo indraindray hanatody, porofon'ny harenan'ny tontolo iainana amin'ity toerana voaaro ity. Mahery kokoa ny ranomasina eto, raha oharina amin’ny Baie de Sakalava. Manome endrika ny onja entiny anefa izany ary mety tsara ho an’ireo mpankafy onja mahery kokoa rehefa milalao ranomasina. Mifanohitra tanteraka amin'ny fitonian'ny ranomasin’ny Baie de Sakalava izany.
Copyright Image : © Baie des Dunes - Moov
Baie de Pigeon : Toeran’ny fitoniana
Farany, sady azo lazaina ho kely indrindra amin’izy telo ny Baie de Pigeon. Dia tongotra miainga avy eo amin’ny Baie des Dunes dia tonga, eo ho eo amin’ny 5 minitra eo. Raha somary be olona ny Baie de Sakalava dia mifanohitra tanteraka amin’izany ity farany ity. Toerana natao ho an’ireo tia filaminana sy mankafy mitokatokana ny Baie de Pigeon. Manana torapasika fotsy madio ihany koa izy ary ny ranomasina dia miloko maitso - manga. Tsy misy mpilomano fa olona mandalo, mijerijery ny toerana no hita ao. Mety indrindra ho an’ireo te hilamin-tsaina kely araka izany ny fisiany. Ny anarany kosa dia avy amin’ny vorona isan-karazany izay mitsidika matetika iny faritra iny. Tsy dia be olona ao, ka maneho ny filaminana, lavitry ny tabataban’ny tanàna.
Copyright Image : © Baie de Pigeon - Moov
Mila arovana sy kolokoloina
Mihoatra lavitra noho ny hakanton’izy ireo, ireto Baie miisa telo ireto dia lova voajanahary marefo. Ilaina ny miaro azy ireo manoloana ny tsindry avy amin’ny fizahantany sy ny tontolo iainana. Amin’izao fotoana izao dia efa misy ny hetsika hataon’ny fikambanana, mikendry ny hampiroborobo ny fizahantany tompon’andraikitra izay manome lanja ireo tontolo iainana miavaka ireo sady manaja ny fiarahamonina sy ny karazana zavamananaina ao aminy.
Tamin’ny fotoana mbola nampiasaina ny « carte postale » dia saika hita amin’ireny sary ireny hatrany ireto « Baie » miisa telo ireto noho ny hakantony. Mila mandoa vola kosa ireo mpitsidika ny toerana raha miditra avy any amin’ny “Site Orangea”. 2 000 ariary ho an’ny Malagasy ary 10 000 ariary kosa ho an’ireo vahiny.
