Fahasalamana : Miato mandritra ny fotoana voafetra ny fandidiana hataon’ny sambo hopitaly Africa Mercy

Andiany faharoa ny taona 2025

Nanomboka ny volana mey tamin’ity taona 2024 ity ny fandidiana andiany voalohany notanterahin’ity sambo lehibe ity eto Madagasikara. Raha ny fampanantenan’izy ireo tamin’ny fotoana nahatongavan’ity fikambanana ity mantsy dia hisy fandidiana andiany roa amin’ity fandalovany ity. Nanamafy araka izany izy ireo tao anatin’io fanambarana niarahany tamin’ny Ministeran’ny fahasalamam-bahoaka io fa hiverina ny andiany faharoa amin’io taona ho avy io. Vinavinaina ny hahatongavan’izy ireo indray eto Madagasikara amin’ny febroary io. Efa nanamarika rahateo izy ireo fa haharitra roa taona ny fijanonana eto Madagasikara amin’ity fandalovana ity. Tafiditra ao anatin’ny fikojakojana izay tsy maintsy hatao isan-taona amin’ilay sambo lehibe anefa izao fialan’izy ireo mandritra ny fotoana vitsy izao. Ao anatin’izany ny fanamarinana indray ireo mpiasa isan-karazany ao anatin’ny sambo hopitaly.

Fitsaboana sy fampiofanana

Raha tsiahivina dia tanjon’ity fikambanana ity ny handidy maimaim-poana olona miisa 1 150 amin’ity dian’izy ireo ity. Tafiditra ao anatin’izany ny fanamboarana ireo sima, ny fandidiana katarakta, ny fandidiana tongotra, ny fitsaboana nify sy ireo maro hafa. Etsy ankilany anefa dia mbola isan’ny asa tanterahin’izy ireo ihany koa ny fampiofanana homena ireo mpiasan’ny fahasalamana. Amin’ny fiverenan’izy ireo araka izany dia mbola hanamafy ny fifandraisan’izy ireo hatrany amin’ny Governemanta sy ny vahoaka malagasy ny Fikambanana Mercy Ships. Hitohy ireo fitsaboana maimaimpoana ary hihamafy ny fampiofanana ireo mpitsabo malagasy. Faninefany moa izao, raha tsiahivina, no niantsonan’ny sambo-hôpitalin’ny Mercy Ships ao Toamasina, nanomboka tamin’ny taona 1996.