Amboasary Atsimo : Dahalo iray maty, omby 37 tafaverina
Nahazo vokatra tsara indray ny mpitandro filaminana "Zone de Défense et de Sécurité" (ZDS) Mandrare. Dahalo iray no lavo ary tafaverina tamin'ny tompony soa aman-tsara ireo omby efa ho efapolo.
Omaly faha 6 Febroary, tamin'ny 1ora sy sasany maraina, nisy fanafihan-dahalo sahabo ho dimy ambiny folo (15) eo ho eo, tao amina tanàna iray ao Kaomina Berano-ville, Distrikan'Amboasary Atsimo Faritra Anosy. Nirongo basimborona sy zava-maranitra ireo olon-dratsy ireo. Lasa tamin'izany ny omby miisa 37.
Firaisankina no hery
Raha vao naheno ny vaovao ireo miaramila mpanao fisafoana dia nanainga nanara-dia ireo dahalo, sady nampian'ny fokonolona tosika rahateo. Nisy ihany koa ny fangatahana fiaraha-miasa tamin'ireo sakelika miaramila hafa izy ireo mba hametraka sakana eo Amparanala amin'ny takela-by Akenson eo amin'ny lalana mizotra mankany kaomina Behara. Tamin'ny 5 ora maraina dia raikitra ny fifandonana, ka dahalo iray no lavon'ny balan'ny mpitandro ny filaminana. Azo avokoa ireo omby ka nampodiana any amin'ny tompony.
Tsy mikely soroka mihitsy ny fari-piarovana sy filaminana Mandrare (ZDS Mandrare), izay tarihan'ny Jeneraly ABDOUL Henri Auguste, amin'ny fametrahana fandriam-pahalemana amin'iny faritra iny. Mahavelom-bolo ny vahoaka tokoa izany satria miompy ny ankabeazan'izy ireo.