Fitaterana an-dàlamby Moramanga – Toamasina : Ho fampiroboroboana ny fizahan-tany sy ny ekonomia

Tetikasa tafiditra tanteraka ao anatin’ny fanamorana ny fivezivezen’ny olona sy ny fitanterana ny entana izao famelomana indray ny zotran-dàlamby mampitohy an’i Moramanga sy Toamasina izao. Tsy ho ela intsony noho izany dia hisitraka ny fampiasana iny làlamby iny ireo olona mpivezivezy amin’iny faritra Atsinanana iny.

Dia soa

« Dia soa », io no anaran’ilay fiaran-dàlamby hitondra ireo mpandeha voaloha amin’izao fisokafan’ny fitaterana an-dàlamby izao indray. Hiainga ao Moramanga ny alakamisy 01 jona amin’ny 06 ora mariana ny fiaran-dàlamby Dia soa ary hihazo an’ny Toamasina, araka ny fampahafantarana nataon’ny teo anivon’ny ministeran’ny Fitaterana sy ny famantarana ny toetry ny andro.
Sokajim-pitanterana roa no atolotr’ity fiaran-dàlamby ity. Ao ny sokajy voalohany na « première classe », izay ahitana toerana (place assise) 64. Ao ihany koa ny sokajy faharoa na « deuxième classe ». Ity farany dia afaka mitondra olona hatramin’ny 216. Tsara marihina fa voatsinjara amin’ny « voitures » miisa telo ireo toerana 216, koa ny voiture iray izay taritin’ny fiaran-dàlamby dia ahitana toerana 72.

Fizahan-tany ho fampivoarana ny ekonomia

Olona maherin’ny 100 000 izay mipetraka amin’ny toerana alavitra sy saro-dàlana no afaka hifamezivezy ankalalahana amin’ny alàlan’io zotra io. Tsy mijanona amin’ny maha fitaovam-pitanterana olona azy fotsiny ihany anefa ity fiaran-dàlamby izay hampitohy an’i Moramanga sy Toamasina ity. Tanjona amin’ny fametrahana azy io ny hampiroboroboana ny sehatry ny Fizahan-tany.
Fantatra fa handalo amin’ny tobim-piantsonana 23 izy io. Maro noho izany ny toerana afaka ho tsidihan’ireo mpandeha. Tafiditra ao antin’izany ohatra Andasibe, Brickaville, ary Ambila Lemaitso. Manodidina ny 7 000 ariary ny saran-dàlana ho an’ireo mpandeha misafidy ny « deuxième classe » raha 15 000 ariary kosa ho an’ireo mandeha amin’ny « première classe ». Raha ny mahakasika ny entana kosa dia 110 ariary isaky ny kilao no sara-pitanterana.
Ho an’ireo izay mikasa ny handray ny fiaran-dàlamby eny Brickaville ka hihazo an’i Toamasina dia 7 000 ariary hatrany ny saran-dàlana ho an’ny deuxième classe raha toa ka 10 000 izany ho an’ny première classe.
Inoana hitondra voka-tsoa ara-ekonomika ny fisokafan’io zotra an-dàlamby io amin’ny alàlan’ny fahatongavan’ireo mpizahatany malagasy sy vahiny. Fomba iray ihany koa io hanomezan-danja iny faritra Atsinana iny, sy hanatsarana ny fidiram-bolan’ireo mponina any an-toerana.