Tokony avela handeha tsy manao kiraro ve ny zaza ?

Ny tongotry ny zaza : fitaovana ianarany mandeha

Zava-dehibe ny mahafantatra fa mbola tsy tena matotra ny tongotry ny zaza :
-mbola malefaka ny taolany,
-mbola mivoatra ny hozany,
-mbola tsy voaorina tsara ny faladiany.
Midika izany fa mbola eo am-pivoarana tanteraka ny tongony, ka mila fahalalahana mihetsika izy mba hivoatra tsara.

Ny tombontsoa azo amin’ny mandeha tsy manao kiraro

Maro ny tombontsoa azon’ny zaza amin’ny fandehanana tsy manao kiraro :

Mahatsapa tsara ny tany

Betsaka ny “capteurs” ao amin’ny tongotra. Rehefa tsy manao kiraro ny zaza dia :
-mahatsapa tsara ny karazan-tany (gorodona, karipetra, hazo…),
-mahay mampifanaraka ny fihetsiny amin’ny tany,
-mora mahazo fifandanjana.
Tena manampy azy hianatra mijoro sy mandeha izany.

Manamafy ny hozatra

Rehefa tsy voafatotra na teren’ny kiraro ny tongotry ny zaza dia :
-afaka miparitaka sy mifikitra amin’ny tany ny rantsan-tongony,
-miasa tsara ny hozatra,
-mivoatra ara-dalàna ny faladiany.

Manatsara ny fifandanjana sy ny fandrindrana

Ny mandeha tsy manao kiraro dia manampy ny zaza :
-hifehy ny fihetsiny,
-hanitsy ny diany,
-hahazo fitoniana bebe kokoa.
Izany no mahatonga azy hahay mandeha haingana kokoa sy matoky tena.

Ilaina ve ny kiraro ?

Ilaina ihany, fa tsy amin’ny fianarana mandeha.

Ao an-trano

Raha azo antoka ny tontolo :
-aleo avela tsy manao kiraro ny zaza,
-na mampiasa ba kiraro misy « anti-dérapant » raha malama ny tany,
Izany no tsara indrindra ho an’ny fivoarany.

Any ivelany

Any ivelany kosa dia ilaina ny kiraro mba :
-hiarovana amin’ny hatsiaka na hafanana,
-hisorohana ratra (vato, vera, sns),
-hitazomana fahadiovana,
Mila safidiana tsara kosa nefa ny kiraro ampanaovina ny zaza : malefaka, maivana, manaraka tsara ny endriky ny tongotra, misy faladia manify.

Fahadisoana tokony hialana

Ireto misy zavatra matetika ataon’ny ray aman-dreny nefa tsy tsara loatra :
-mampanao kiraro aloha loatra ny zaza (mbola tsy mandeha akory),
-misafidy kiraro mafy “hihazona tongotra”,
-mampanao kiraro tery na malalaka loatra.
Mety hisy fiantraikany amin’ny fivoaran’ny tongotra izany.

Inona no lazain’ny manam-pahaizana ?

Ny dokotera sy ny manam-pahaizana momba ny zaza dia manoro hevitra ny hamelana ny zaza tsy hanao kiraro araka izay azo atao, satria izany no manampy indrindra amin’ny fivoaran’ny tongony sy ny fahaizany mihetsika.