Ireo antony tsy anaovana tsirambina ny « entretien » ny fiara

Misoroka ny fahasimbana

Ny fanaovana « entretien » ara-dalàna ny fiara dia manampy betsaka amin’ny fisorohana ny fahasimbany. Atao « révisions » ara-potoana avokoa ireo « pièces » miasa be amin’ny fiara mba ampaharitra azy ireny sy hanao ny asany tsara hatrany. Toe-javatra isan’ny manahirana tokoa ny hoe maty na tsy velona tampoka eny an-dalana ny fiara. Ankoatra ny fahasahiranana aterak’izany dia mety handany vola misimisy ihany koa ny fanamboarana azy.

Mampitombo ny « sécurité » ny mpampiasa ny fiara

Maro ny lozam-pifamoivozana mitranga noho ny fahasimbana na tsy fahatomomban’ny fiara. Mba isorohana ireny karazana loza ireny dia tsy azo atao tsirambina ny « entretien » na ny fikojakojana ny fiara. Marihana fa rehefa ela niasa ireo « pièces » amin’ny fiara dia miha tsy miasa tsara intsony na simba mihintsy. Mety mitarika tsy fahatomombanana amin’ny hisatra, fiodinana sy ny « sécurité » ny fiara izany. Rehefa atao « entretien » tsara ity farany dia hita ireo « pièces » mila soloina sy ireo tsy fahatomombanana mila amboarina aminy.

Mampihena ny fandaniam-bola amin’ny fanamboarana

Matetika dia lafo kokoa ny manamboatra ny fiara simba raha oharina amin’ny fanaovana « entretien » azy. Miankina betsaka amin’ilay fahasimbana moa izany fa raha toa ka ratsy fikojana ny fiara dia mety miafara amin’ny fahasimban’ny hain-dehibeny, toy ny motera, izany. Amin’ny voalohany dia mety « pièces » tsotsotra sy tsy lafo vidy no tokony amboarina na soloina. Raha toa ka tsy norarahiana izany « pièces » izany dia mety hanimba ny « pièces » hafa mifandray na manodidina azy ary mihitatra hatrany izany fahasimbana izany. Raha izay no mitranga dia ho lafo tokoa ny vola ilaina amin’ny fanamboarana sy ny fanorenana ny simba.