Taombaovao Malagasy Alahamadibe : Joro, fangataham-pitahiana sy fampihavanana
Fomba Sakalava ny Joro. Notanterahina teny Ankazomalaza Ambohimanga nefa izany, noho ny efa nampiraisan'Andrianampoinimeina ny Foko Merina sy Sakalava.
Tafiditra tao anatin'ny fandaharam-potoanan'ny fankalazana ny Taombaovao Alahamadibe ny Joro. Tsy dia fanao loatra aty afovoan-tany izany, saingy efa tafiditra ao anatin'ny fomba fanao mihitsy raha ho an'ny eny Ankazomalaza Ambohimanga. Io toerana io mantsy no nampiraisana ny fanjakana roa, dia ny Merina sy ny Sakalava. Ahitana ny doanin'ny Mpanjaka roa tonta ao an-toerana, dia ny an'i Andrianampoinimerina, Mpanjaka Merina, sy ny an'i Andriamisara, Mpanjaka Sakalava.
Hira sy vavaka ara-drazana
Tao amin'ny Lapan'Andrianampoinimerina no nanatanterahana ny fiantsoana ireo razambe mpanjaka tany aloha, ka anisan'izany io mpanjaka voatonona anarana io. Vaky Sova no nanombohana izany, ka zokiolona teo an-tanàna no mihira, arakaraka ny tononkira tonga ao am-bavany. Misy valin-kira efa ataon'ny mpanotrona amin'izany. Rehefa vita izany, miditra amin'ny dihin'ny Ntaolo ny mpikarakara. Miodidina ilay faritra fanasinana ireo mpandray anjara, sady miantso ireo fanahin'ny zanahary sy ny razana. Solom-bavaka moa izany. Marihana fa misy mozika tendrena mandritra ny Vaky Sova sy ny Dihin'ny Ntaolo. Manafana ny fotoana ihany koa ny tehaka sy ny horakoraka ataon'ireo mpanotrona.
Sorona omby
Rehefa tontosa ny "fiantsoana ny zanahary sy ny razana", miditra amin'ny "sorona omby" ny mpanao Joro. Ireo mpandala fomban-drazana moa no mitarika amin'izany.
Omby Mazavaloha no natolotra natao sorona tamin'izany. Misy moa ny fikarakarana manokana notanterahina mialoha ny namonoana azy. Nampirehetina ny Afo teo amin'ny tany malalaka. Rehefa vita izany dia nohadiana ny lavaka kely efajoro. Notsofin-drano ilay omby avy eo mba hitondra soa, ary natao izay hahalavo azy. Natao izay ifandrifian'ny tendany teo amin'ilay lavaka efa-joro, mba ho latsaka ao ny ràny. Alatsaka amin'ny tany izany ny ràn'ilay omby.
Tsara ny manamarika fa nofon-kena mitam-pihavanana ihany koa ny vono omby toy izao rehefa andro fety toa ny Alahamadibe. Iaraha-mahandro sy mihinana ny hen'omby ho marika fa "iray tsy mivaky" ny malagasy rehetra.
