Mpivady : Ireo anton-javatra misy fiantraikany amin’ny filana ara-nofo

Ny hormonina sy ny fifandanjana ara-batana

Ny filana ara-nofo na « libido » dia ny faniriana hiray ara-nofo. Ny hormonina no iray amin’ireo singa lehibe mifehy azy io. Ho an’ny lehilahy, ny « testostérone » no hormonina manan-danja indrindra, ary rehefa mihena izy io dia mety hihena ihany koa ny « libido » sy ny hery ara-nofo. Ho an’ny vehivavy kosa, ny fiovaovan’ny hormonina mandritra ny fadimbolana, fitondrana vohoka, fampinonoana na » ménopause » dia mety hampitombo na hampihena ny faniriana ara-nofo. Ankoatra izany, ny aretina sasany na ny tsy fifandanjan’ny hormonina dia mety hiteraka fiovana tampoka amin’ny filana ara-nofo.

Ny toe-tsaina sy ny fihetseham-po

Misy fiantraikany lehibe amin’ny filana ara-nofo ny toe-tsaina. Matetika rehefa ao anatin’ny adin-tsaina be, tebiteby, na fahaketrahana ny olona iray dia mihena ny faniriana hanao firaisana. Ny havizanana ara-tsaina sy ny olana isan’andro dia mety manakana ny saina tsy hifantoka amin’ny fiainana ara-nofo. Mifanohitra amin’izany kosa, ny fahatoniana, ny fahasambarana ary ny fahatokisan-tena izay tena manampy amin’ny fanatsarana ny « libido » sy ny fahatsapana ara-nofo.

Ny kalitaon’ny fifandraisana amin’ny mpivady

Ny fifandraisana ara-pitiavana dia manana anjara toerana lehibe amin’ny filana ara-nofo. Raha misy fifampiresahana tsara, fifampitokisana ary firaiketam-po eo amin’ny mpivady dia matetika mihatsara ny faniriana ara-nofo. Raha misy kosa ny ady tsy miravona, ny tsy fifampihainoana na ny fahazarana mitovy isan’andro, dia mety hihena tsikelikely ny « libido ». Ny fifandraisana akaiky ara-pihetseham-po matetika no manamafy ny fifandraisana ara-batana.

Ny fomba fiaina sy ny fahasalamana amin’ny ankapobeny

Misy fiantraikany mivantana amin’ny filana ara-nofo ny fahasalaman’ny vatana. Ny tsy fahampian-torimaso dia mampihena ny angovo sy ny fahavitrihana. Ny sakafo tsy voalanjalanja dia mety hanakorontana ny hormonina sy ny fiasan’ny vatana amin’ny ankapobeny. Ny tsy fanaovana fanatanjahan-tena dia mampihena ny fivezivezen’ny rà sy ny fahaveloman’ny vatana. Ankoatra izany, ny fisotroana toaka be loatra na ny fifohana sigara dia mety hampihena ny « libido » sy ny fahafahan’ny vatana mamaly ara-nofo.

Ny taona sy ny fiovana voajanahary

Miova arakaraka ny taona ny filana ara-nofo. Matetika amin’ny fahatanorana sy ny fiandohan’ny fahalebiazana dia mahery kokoa ny « libido » noho ny fiovan’ny hormonina. Rehefa mihalehibe kosa dia mety hihena tsikelikely izy io, saingy tsy midika izany fa tsy misy intsony ny faniriana. Raha salama tsara ny vatana sy ny saina, dia mbola afaka manana fiainana ara-nofo mavitrika ihany koa ny olona, na lahy na vavy, na dia efa antitra aza.