Tetikasa « Digital Learning » : Notolorana « tablettes » ny EPP roa any amin’ny CISCO Ambalavao

Fanatsarana ny kalitaon’ny fampianarana

Tetikasan’ny fikambanana tsy miankina amin’ny Fanjakana, Ny Taniko, sy ny Feedback Madagascar, iarahan’izy ireo manatanteraka, ny « Digital Learning ». Sekoly ambaratonga fototra miisa roa ao amin’ny Fari-piadidiam-pampianarana (CISCO) Ambalavao, ao anatin’ny fitaleavam-paritry ny Fanabeazam-pirenena (DREN) Matsiatra Ambony, no misitraka izany, dia ny EPP Tanamarina sy EPP Ankarinomby, samy ao amin’ny kaominina Ambohimahamasina.

Tafapetraka tamin’ny faran’ny herinandro lasa teo ity tetikasa « Digital Learning » ity, ka tanjona ny hanatsarana ny kalitaon’ny fampianarana, amin’ny alalan’ny teknôlôjia nomerika. Araka izany, voarakitra ao anaty « tablette » ny lesona rehetra, ary ampiasaina miaraka amin’izany « tablette » izany ny « projecteur », mba hahafahan’ny mpianatra manaraka ny fampianarana.

Mpampianatra voaofana

Natolotra ho an’ireo mpampianatra, izay efa nofanina mialoha, ireo fitaovana nomerika hanatsarana ny kalitaom-pampianarana, ao amin'ny EPP Tanamarina sy EPP Ankarinomby ireo. Tanjona ny fampitoviana lenta ny ankizy malagasy eo amin’ny sehatry ny fanabeazana. « Nomena tombon-dahiny ireo ankizy monina amin’ny tontolo ambanivohitra mba hisitraka fihavaozana ara-teknôlôjia. Eo ihany koa ny fanatsarana ny fahaiza-manaon’ireo mpampianatra, mba hiditra amin’ny sehatra matianina kokoa amin’ny fanarahana ny teknôlôjia, izay efa tsy azo ialana intsony ankehitriny », hoy ny fanazavan-dRaharilaza Nathalie, tomponandraikitry ny fandaharanasa eo anivon’ny ONG Ny tanintsika sy Feedback Madagascar. Araka ny fantatra dia efa misy ny lesona rehetra mifandraika amin'ny programam-mpampianaran'ny Ministeran’ny Fanabeazam-pirenena ao anatin'ireo fitaovana nozaraina ireo

Miara-miasa akaiky amin’ny DREN Matsiatra Ambony, ny CISCO Ambalavao ary ny ZAP Ambohimahamasina ny ONG Ny Tanintsika sy Feedback Madagascar, amin’ny fanatanterahana izao tetikasa izao.