Mahajanga : Mampimenimenina ny mponina ny fahatapahan-jiro mifandimby

Naharitra hatramin’ny 18 ora

Mitaraina ireo mponina. Efa nanomboka tamin’ny alakamisy lasa teo ny fahatapahan-jiro mifandimby. Raha ny filazana dia tokony ora telo teo no nahatapahan’ny jiro ho an’ireo faritra miisa hatramin’ny 22 tao Mahajanga. Niova anefa ny fisehon-javatra hoy ireo mponina raha naharitra efa hatramin’ny 18 ora ny fahatapahana ho an’ireo tanàna samihafa. « Tsy nahazo jiro izahay nanomboka tamin’ny 11 ora alin’ny sabotsy hatramin’ny 2 ora tolakandro ny ampitson’io andro io. Io alahady io ihany koa dia nitovitovy tamin’izay. Betsaka ny zavatra tsy mandeha noho io olana io », hoy ireo mponina any an-toerana. Amin’izao anefa dia mbola mitohy hatrany io fahatapahan-jiro io. Efa manomboka mitombo ny olana aterak’izany. Raha tsy hiteny afatsy ny fikatonan’ireo toerana fanamboarana volo sy ireo toeram-pivarotana mila jiro foana.

Fotoam-pialantsasatra

Anisan’ny mampitombo ny fahatezeran’ireo mponina any an-toerana amin’izao fotoam-pialan-tsasatra izao izany olana eo amin’ny famatsiana izany. Miteraka olana eo amin’ny rano ihany koa. Mitombo anefa ny olona any an-toerana ka tokony hampiakatra ny fidiram-bola izany saingy ny mifanohitra amin’izany no hitan’izy ireo. « Rehefa tapaka ny jiro dia tsy mahalafo ninoninona izahay. Mafana anefa ny andro tokony hahazo tombony betsaka izahay amin’izao fotoana izao. Simba daholo ny fidiram-bola », hoy ity mpivarotra « glaces » iray ao an-tampon-tanànan’ny Mahajanga. Fotoana iray mampitombo ny olona mifamezivezy any an-toerana izao ka mangataka ny mba hiverenan’ny famatsiana amin’ny laoniny ny mponina. Nanamarika anefa ny orinasa JIRAMA fa efa mifandray hatrany amin’ireo orinasa mpitatitra mba hanafainganana io fitaterana io.