Fahasalamana: Miparitaka amin'ireo olona madio indray ny aretina lagaly

Mifindra amin'ny fifampikasohana

Mitovy amin'ny fitsaboana ny lagaly rehetra ihany ny fomba fitsaboana ity aretina azo lazaina ho hafahafa ity. Raha tsiahivina ny aretina lagaly dia mpahazo ireo olona monina eny amin'ny toerana ahitana loto miangona sy rano maloto miandrona matetika. Izany hoe aretina azo avy amin'ny loto ity aretina ity. Amin'ity karazany vaovao ity anefa dia ireo olona madio indray no tratrany. Manazava ireo mpitsabo araka izany fa mivoatra ihany koa ny aretina. " Miova ny fomba fisehon'ilay aretina saingy toy ny fomba fitsaboana ny lagaly rehetra ihany. Etsy andaniny dia mifindra amin'ny alalan'ny fifampikasohan'ny vatana ihany izy io", hoy ny mpitsabo nanazava izany. Manamafy araka izany ireo mpitsabo mandray ireo marary fa aretina toy ny lagaly rehetra ihany izy ity. Teo ho eo amin'ny roa volana teo no nisehoan'ity aretina ity ary efa maro ihany koa ireo tratrany.

Noho ny fiovaovan'ny toetr'andro

Mivoatra manaraka ny fivoaran'ny toetr'andro sy ny tontolo iainana ny aretina. Izany indrindra no mahatonga ity fisehon'aretina vaovao ity, hoy ireo mpitsabo. Miaraka amin'izany dia anisan'ny mahatonga karazana aretina samihafa ihany koa ny sakafo hoanina amin'izao fotoana izao. Nanamarika ireo mpitsabo fa tokony hitandrina hatrany amin'ny fomba fiaina. Ao anatin'izany ny fitandremana momba ny fahadiovana sy ny rano ampiasaina. Ao anatin'izany ihany koa ny karazana sakafo hoanina. Nanamafy anefa ireo mpitsabo fa misy ny fanafody hitsaboana ireo marary. Tokony hanatona mpitsabo ihany koa raha vantany vao mahatsapa fiovana mba hahafahana manapaka ny firongatry ny aretina.