Tsipy Kanetibe : Miverina eo amin’ny sehatra iraisam-pirenena i Madagasikara

Andriamahazo Haja, Andrianjaka Jean Michel, Ramanantiary Faralahy Urbain Joseph, sy Razafimahatratra Herilantosoa no ekipa voalohany hisolo tena ny ekipam-pirenena Malagasy eo amin’ny taranja Tsipy Kanetibe. Hifaninana amin’ny « tournée estivale » manomboka ny volana Jolay kosa i Ralison Heritiana Guillaume, Rakotondrainibe Jean François, Andrianiaina Christian Martin. Mpilalao fiandry kosa i Rakotoniaina Faratiana.
Naneho ny fahavononana hanampy ny federasioana ny sport boules Malagasy ireo diaspora Malagasy any an-toerana raha ny fampafanatarana nataon’izy ireo omaly faha 07 jona 2024. Tsiahivina , efa nisy ny fifantenana ireo mpilalao nanomboka ny faha-23 ny volana mai 2024, tany Antsirabe. Ny faha-25 ny volana May moa no nivoahan’ny lisitr’ireo mpilalao ofisialy.

Tapitra hatreo ny sazy

Efa nofoanan’ny federasiona iraisam-pirenena ny sazy nihatra tamin’i Madagasikara nandritra ny telo taona. Sazy tsy nahafahana niatrika ireo fifaninanana iraisam-pirenena. Tsiahivina fa nanomboka ny taona 2021 no nilatsaka ity sazy nihatra tamin’ny Madagasikara ity noho ny fitantanana tsy nanaraka ny rafitra ara-dalana.
Tapaka nandritra ny fivoriambe ampitain-davitra nataon’ny kaomity mpitantana eo anivon’ny Federasiona iraisam-pirenena FIPJP ny 5 Aprily 2024 teo ny fanafoanana izany sazy izany. Ny Alakamisy 25 Aprily 2024 no namoahan’ny filoha iraisam-pirenena ny tsipy kanetibe Claude Azema ny taratasy fampafatarana izany fanafohanana ny sazy izany ho any filohan’ny federasiona sport-boule Malagasy.
Mbola misy hatrany kosa ny fepetra fanaraha maso napetraky ny FIPJP. Fametrahana ireo fepetra toy ny fitondrana tsara tantana, ny fisian’ny mangaraharaha eo amin’ny fanomezana ireo kara-pilalaovana na ny licence ary ny lafiny teknika.