Fahasalamana : Mila ampiakarina isan-taona ny teti-bola, mba hanaraka ny fenitra

Sehatra ara-tsôsialy mila fanatsarana

Tafiditra ao anatin’ireo lafiny ara-tsôsialy tokony hatsaraina, ary notakian'ny vahoaka teny an-kianja, ny fanatsarana ny sehatry ny fahasalamana eto Madagasikara. Nanao ezaka mizotra mankany amin’izay ny Fitondram-panjakana, raha ny nambaran'ny solombavambahoakan’i Madagasikara voafidy tao amin’ny Distrikan’i Moramanga, sady filohan’ny vaomieran’ny fahasalamana sy ny fandrindram-piterahana eo anivon’ny Antenimierampirenena, Rajaobelina Lova Herizo. Nahitana taratra izany ny fankatoavan’ny Fanjakana malagasy ny fandoavana ny anjarany, amin'ny fividianana ny vaksiny ho an'ny taona 2025, araka ny tatitry ny filàn-kevitry ny minisitra tamin'ny datin'ny 19 novambra 2025.

Notsiahivin'ny depiote Lova Rajaobelina, fa mbola miankin-doha amin'ireo mpiara-miombona antoka i Madagasikara hatreto, amin'ny ampahany betsaka, amin'io lafiny famatsiam-bola ny vaksiny io. Mbola ny 85%-n'ny teti-bola atokana ho an'ny vaksiny, hoy izy, no avy amin’ireo mpamatsy vola, toy ny Alliance GAVI. Notsipihiny fa tokony hitombo isan-taona io anjaran’ny Fanjakana malagasy amin'ny fividianana vaksiny io.

Mbola tsy ampy ny teti-bola

Etsy an-daniny, nisy ihany koa ny fanitsiana nentin'ireo Solombavambahoaka, ka nahatonga fiakarana teo amin'ny teti-bola atokana ho an'ny fahasalamana, amin'ny ankapobeny. Mitentina 89 miliara ariary ny fampitomboana nentina tao anatin'izany teti-bola ho an'ny fahasalamana izany. Mbola betsaka ny mila arenina eo amin'ity sehatra ara-tsôsialy iray ity, raha ny nambaran'ny Dr Rajaobelina Lova, toy ny fotodrafitrasa, ny isan’ny mpiasan’ny fahasalamana izay tokony hampitomboina ireo horaisina ho mpiasam-panjakana. Mila fanatsarana ihany koa ny fandaminana ny fitantanana amin’ny ankapobeny. Fehiny, mila manao ezaka tsikelikely isan-taona ny Fanjakana mba hahatrarana ny tanjona, dia ny hanokanana ny 15%-n'ny teti-bolam-panjakana ankapobeny ho an'ny fahasalamana, araka ny Fifanarahan'i Abuja (Déclaration d’Abuja), hoy ny Solombavambahoaka voafidy tao Moramanga.

Nandritra ny fanokafana ny hetsika Agora Santé, androany 28 novambra 2025, teny amin'ny kianja Barea Mahamasina, no nanehoan'ny depiote Rajaobelina Lova ny heviny momba ity teti-bola atokana ho an'ny Fahasalamana eto Madagasikara ity. Hetsika maimaim-poana, ahitana ireo matihanina rehetra misahana ny fahasalamana amin’ny toerana iray ny Agora Santé, izay haharitra roa andro.